如果要數2021年最興嘅飲食文化，一定係Omakase同打卡餐廳。上環有間日本料理品牌，就一次過集呢兩個元素於一舖，打破Omakase典型嘅日式木系裝潢，換上重裝，並由傳奇日本料理大師見城俊二退休前最後一位入室弟子主理，自家創作多款菜式。

無論係一入門口、壽司吧枱，定係走廊，都掛滿一串串閃令令嘅金銀圓片，感覺就係奢華。不過唔使擔心，食物就唔係「奢華價」嚟嘅，$450起可以食到個Omakase lunch。師承日本料理大師見城俊二嘅料理長耀師傅，擁有廿幾年日本菜經驗，功架十足，亦樂與客人談笑風生，營造輕鬆嘅用餐氣氛。

火炙鮪腩配山葵泡沫係耀師傅自家創作嘅菜式之一，先將新鮮日本山葵磨成蓉，隔渣後取精華製成山葵忌廉，連同炙燒過嘅大拖羅放上最中餅，並以法國魚子醬同銀箔作點綴。一啖放入口，既可感受到大拖羅嘅甘香油脂，亦有微辛香滑嘅泡沫伴隨住，仲有微微鹹鮮香，層次豐富。

擺碟精美嘅清酒蒸日本赤鮑配鮑魚肝醬，有爆谷乾花作配襯，係幾有新鮮感，爆谷搭鮑魚呢個combination包你未試過。建議可以先食一片軟腍鮮香嘅鮑魚，再將爆谷灑落香滑濃味嘅魚肝醬中，點埋第二片鮑魚，感受口味同口感嘅變化。

賣相整到靚一靚嘅，仲有鮪碎牡丹蝦配海膽醬。師傅以刺身級別嘅日本海膽製成海膽醬，再層層疊上壽司飯、吞拿魚、牡丹蝦、海膽同法國魚子醬。雖然砌到好靚，但建議係要攪勻佢嚟食嘅。一啖食到咁多種食材，食到嘅唔止係鮮味，係滿足感啊。

Omakase當然唔少得壽司，其中3款時令壽司包括深海池魚壽司、剝皮魚壽司、筋子壽司。

鈴 · 鮨刃
地址: 上環文咸東街22-26號柏廷坊25樓

文、相、片：Kar