青衣之前都畀人話係美食沙漠話到出晒名，但隨住之前青衣期二期落成，近年都愈嚟愈多餐廳進駐，亦有唔少食店係仲未被發掘到，～今次介紹五間餐廳畀大家，有人氣西餐廳、韓式吐司專門店、啱啱轉型嘅日式居酒屋、日本過江龍壽司店同港式小食店，青衣終於可以洗脫美食沙漠污名啦！
人氣西餐廳 Beans the Rambler
圖: 呢間餐廳無論開喺邊區都係人龍店，皆因佢食物質數高之餘又抵食～今年年頭嘅時候終於開到去青衣啦。必食有招牌黑松露軟殼蟹意粉，醬汁夠creamy黑松露味都幾突出，每一條意粉都掛上滿滿醬汁，軟殼蟹又炸得夠香口。德國燒豬手就啱晒sharing，外皮鬆脆唔油膩，肉質惹味嫩滑，配埋黑醋燒汁同酸椰菜食，更可減低肥膩感。
韓式吐司專門店 Toast Luck
圖: yumsik
掛住韓式吐司嘅味道？青衣島民而家唔使特登搭車出去都食到啦～呢間韓式吐司專門店主打十款口味嘅吐司，款款都好足料，而且味道都好有特色。好似墨西哥芝味煙肉薯餅吐司，麵包先煎香再塗上秘製蜜糖醬，表面金黃香脆內裡軟熟，餡料有香脆嘅薯餅、煙肉、雞蛋同芝士，你話一啖食落去會幾滿足！？另外仲有基本款火腿芝士吐司、至尊薄餅薯餅吐司、炸雞吐司同牛油果吐司等選擇，當然唔少得各款韓式街頭小食啦～
高質日式居酒屋 Present
圖: tiffsuet
本身係一間主打意粉同牛扒嘅西餐廳，幾個月前重開，仲搖身一變做日式居酒屋，口碑都唔錯呀～人氣食品包括呢個蟹膏玉子燒，玉子蛋味香濃帶少少甜味，而且蟹膏份量完全無手軟，一入口就感受到濃濃蟹膏香啦。鹿兒島一口牛嘅熟成程度啱啱好，肉質軟腍牛味又幾重。卷物方面可以試下黑松露帶子卷，新鮮帶子配上黑松露，餡料包住雞蛋、青瓜同蟹柳，成個感覺好fresh！
日本過江壽司店 梅丘壽司の美登利総本店
圖: ayurain0139
返開鄉下嘅朋友應該都對呢間壽司店唔陌生，當初估都估唔到會進駐青衣呀！最抵食係午市定食，一人前手握壽司盛合同特盛手握壽司盛合都只係$138同$188，極上吞拿魚丼$198，呢個價錢食到咁新鮮嘅質素，性價比好高～唔想食set嘅都可以選擇單點壽司，款款都好大件，特別係招牌鰻魚壽司，原條鰻魚上，味道香甜有魚油香，必試之選！
地道港式小食店 華記小食店
圖: mohkc
青衣區地道港式小食店，對於唔熟青衣嘅朋友仔，位置係有少少難搵。呢度嘅車仔麵最受街坊歡迎，因為款款配料都係老闆嘅誠意之作～如黃金蘿蔔相當入味，又甜又無渣；黑糖煙燻雞翼微甜帶陣陣煙燻香，有特色！小食方面桂花蜜燒墨魚丸係新鮮手打，每粒形狀不一，未入口就聞到燒魷魚香，外皮香脆肉質彈牙，配埋滿滿桂花蜜係唔錯嘅！
文: Yanica