京都逾60年歷史嘅和菓子老店京榮堂，喺2016年開設呢個新一代和菓子品牌，而首間以茶寮形式開設嘅新分店就選址荃灣，更帶嚟一系列香港茶寮限定嘅自家製甜品、日式定食同輕食。
餐廳採用開放式設計，感覺幾casual。
期間限定赤色林檎班戟（$118）
附有用林檎蘋果製作嘅配料同忌廉
香港店以茶寮形式登場，當中有唔少新設計嘅菜式，而採用日本麵粉製作嘅班戟系列就係其中一項喇。赤色林檎班戟係期間限定款式，特別之處係所配嘅林檎蘋果果肉，同用其果汁製成嘅啫喱，都由日本製作再運嚟香港，味道酸酸甜甜，同蛋味突出嘅班戟好夾。
宇治抹茶班戟（$102）
空氣感十足
多款長期供應嘅班戟口味之中，宇治抹茶味好受歡迎，因為配上來自總店、口感軟糯嘅蕨餅外，加埋紅豆、抹茶雪糕、抹茶醬同大量抹茶粉，有齊甘、香、甜嘅味道。
仁王門御膳（$158）
食正餐想豐富啲嘅話，仁王門御膳就啱晒喇。九宮格設計唔只IG-able，每格食物都係唔同嘅京都傳統家常料理，更包含冷熱同葷素款式。
左：燒鯖魚｜右：京都⽟⼦燒
北寄貝沙律、吉列炸蠔、日式燒茄子等九款食物都幾惹味，其中燒鯖魚鹹香唔油膩，而厚肉嘅京都⽟⼦燒香甜又juicy。
仁王門定食（$98）
如果想自選餸料，仁王門定食就提供七款配菜畀大家任揀兩款。開飯仔當日試咗牛肉煮同吉列廣島蠔，前者鹹甜度適中，後者外脆內嫩，咬開更有蠔汁滲出嚟。
半熟蛋蟹肉吐司配薯菜（$108）
輕食則推介大家試半熟蛋蟹肉吐司，蟹肉肉量幾多，製成沙律做餡料仍然好鮮甜；配埋流心半熟蛋提香，清得嚟幾滋味。另伴上炸薯條同蔬菜沙律，可以同朋友開心share。
抹茶煉乳奶昔（$52）
呢度嘅飲品都好啱打卡，抹茶煉乳奶昔喺沙冰底加上厚厚嘅忌廉，托起大量宇治抹茶粉、蕨餅同紅豆，入口甘甜香滑，層次豐富。
地址：荃灣大河道100號海之戀商場地下G22-G23號舖
文、相：Cathy.C