春天應該係一個粉紅色嘅季節，有人氣甜品café就推出咗一系列嘅粉紅色主題蛋糕，同埋4款全新fresh crepe，女生們好難抗拒呢。
(左) 特濃士多啤梨香蕉朱古力 $68、(右) 焦糖雞蛋布丁 $78
4款全新fresh crepe口味包括抹茶六重奏、焦糖雞蛋布丁、特濃士多啤梨香蕉朱古力，同埋士多啤梨Mont Blanc。全部嘅crepe餅皮都係由café自家調製嘅漿粉所製，好有誠意。
抹茶六重奏 $78
叫得抹茶六重奏，當然就係有6款唔同嘅抹茶味道同口感啦。軟身嘅餅皮係抹茶味走唔甩啦，即叫即製㗎，入面捲住嘅有自家製抹茶海綿蛋糕、抹茶朱古力脆脆、抹茶軟芝士忌廉同抹茶醬，頂頭再灑多層抹茶粉，啖啖都係抹茶嘅濃香甘澀，但有時軟身，有時硬脆，好有驚喜。
士多啤梨Mont Blanc $88
至於士多啤梨Mont Blanc嗰隻，餅皮當然就係粉紅色，士多啤梨味啦，內餡有士多啤梨醬、蛋白餅、白朱古力脆脆，仲有粒粒真‧士多啤梨果肉呢！面層嘅士多啤梨mont blanc軟滑香甜，啖啖豐富口感。
另外仲有多款春日粉色主題蛋糕，堂食又得，買走返屋企都得。士多啤梨蒙布朗蛋糕微甜，玫瑰慕絲蛋糕外表夠煞食，食落仲有陣陣玫瑰清香，特別推介櫻花海綿卷同玫瑰荔枝蛋糕，前者鬆軟帶花香，後者清甜。
(左) 玫瑰慕絲蛋糕 $58、(右) 士多啤梨蒙布朗蛋糕 $78
(左) 櫻花海綿卷 $68、(右) 玫瑰荔枝蛋糕 $68
文、相、片：Kar