出街食飯，揀間靚景嘅餐廳，定好食嘅？Why not both？

荃灣新開嘅漢堡店：b.o.t.h. by Texas Burger，就符合晒呢兩大條件啦~ 落地大玻璃窗、樓底又高，自然光滲入嚟夠晒光猛又有空間感，無論望出去嘅街景定餐廳內嘅裝飾，都有好多綠色植物，感覺放鬆。至於食物方面，除咗本身招牌德州手工漢堡外，新店亦有多款限定菜式，配搭仲頗有新意，坊間少見。

 燒骨髓牛肉芝士漢堡

打頭陣要介紹嘅係皇牌，亦係新店限定兼每日限量供應嘅燒骨髓牛肉芝士漢堡。原條燒骨髓跟埋一齊上碟，上面鋪滿用香料炒過嘅菇菌，同特製酸辣醃菜piccalilli，夠晒睇頭，滿滿油香但又唔會太膩。而漢堡肉則係由唔同部位、粗幼度不一嘅安格斯牛肉，自家手工製成，肉味香濃又有口感。另外跟配特製威士忌煙肉洋蔥果醬，想減低膩度嘅可以搽少少。

 提華納玉米脆片沙律

新店同本店比較，最大分別就係擺盤放多咗心思，好似呢個提華納玉米脆片沙律咁，砌到好似成個碗咁。「碗底」係炸脆咗嘅墨西哥玉米薄餅，上面放滿芝士、辣椒、牛油果醬同Salsa醬混成嘅沙律，食嗰陣啪開啲脆脆，當taco咁食就得。味道酸酸辣辣，幾清新。

 廣島蠔班尼迪蛋

邊個話weekend先可以有brunch食？呢間餐廳實行日日都咁chill，brunch menu每日供應。通常brunch都會有得揀班尼迪蛋，但配廣島蠔呢就唔係周圍都搵得到喇。呢個新鮮組合，味道出奇地夾，酥炸廣島蠔外脆內軟，啖啖鮮甜，拮穿埋隻流心蛋，沾上流出嘅蛋漿，夾埋鬆脆多士一啖放入口，係滿足感啊。

 伯爵茶朱古力

伯爵茶同朱古力都係一向深受歡迎嘅飲品，溝埋一齊又會係點？用上56%嘅可可，甜苦度剛好，既有朱古力嘅甜香，亦不失伯爵茶嘅芳香，值得一試。

 核果奶蓋班戟

一餐直落食埋甜品先至完美，貴為人氣餐廳，點少得人氣甜品？登登登櫈，壓軸出場嘅有核果奶蓋班戟。以日本雞蛋同日本麵粉製作，淋埋特製吉士醬，賣相吸引。兩層嘅班戟入口鬆軟，蛋香十足。周邊有多款生果如蜜桃、士多啤梨、藍莓伴碟，仲有陣陣肉桂香。

B.O.T.H. by Texas Burger   
地址: 荃灣大壩街4-30號荃灣廣場3樓337號舖

文、相、片：Kar