飲黑糖珍珠、珍珠奶茶飲到厭？咁可以考慮轉吓口味，試試呢間嚟自內地嘅人氣飲料品牌我是酸奶君啦。我是酸奶君喺內地有約700間分店，海外就分別喺加拿大同澳洲開設，今次終於到香港啦！店舖選用100% 新鮮牛奶同天然乳糖，酸奶由雲南牧場直送，再經過72小時慢酵後製成獨立包裝，每份都必定喺24小時內使用，保證新鮮。

吃米酸奶($29)

招牌吃米酸奶其實就係酸奶內加咗紫米同糯米，酸奶感覺較滑身，而紫米有強腎同補血功效，經過浸泡、篩選、微醺、煮沸、過濾同攪拌等工序，先可以選出飽滿同圓潤嘅紫米粒，口感軟糯Q彈。然後再將紫米冷卻至70度，咁就可以散發到天然嘅甜味。而且每一份紫米都一定會喺4小時內使用，呢杯建議餐前飲用或者做代餐都可以～

芒芒果海($38)、莓果粒粒($38)

如果又想飲酸奶，又想食紫米同時又想飲果汁？咁呢杯芒芒果海同莓果粒粒就啱晒貪心嘅朋友們！吃米酸奶基底上加入新鮮即榨芒果汁，味道清新。而莓果粒粒就係將新鮮士多啤梨整成蓉，再加入酸奶內，仲可以食到一粒粒嘅士多啤梨㗎～

益生草莓君($40)

食飽飯想飲杯嘢清吓腸胃，益生草莓君係個唔錯嘅選擇，佢係酸奶、士多啤梨同茉莉綠茶嘅結合，除咗酸甜仲帶少少茶嘅甘香，解膩一流～

我是酸奶君

地址: 旺角豉油街60 -102號地下A舖

文、相、片: Yanica