最近演員黃秋生喺Facebook大呻食咗個又貴又唔正宗嘅海南雞飯，有唔少星馬泰Fans勸佢飛去食好過。但自問年中就無哂假嘅你同我，唔通留喺香港就食唔到平靚正嘅海南雞飯？不如等開飯仔介紹以下四間定價合理又有水準嘅餐廳，未必食過番尋味，但應該唔會食到一肚氣。
 

正宗新加坡風味　　文華雞飯(新加坡)

圖：Cur

喺香港食到嘅海南雞飯主要分新加坡式同泰式，而呢間就係以正宗新加坡式海南雞飯聞名。雞肉可以揀白雞或者燒雞，前者雞肉用白滷水浸熟，要靠三款自家製醬料：黑豉油、辣醬同薑蓉吊味，後者就加咗豉油，雞皮較靭。兩款嘅皮下脂肪都算少，而且雞肉相當嫩滑。油飯亦粒粒分明有油香。
 

太安樓$28海南雞飯　　海南雞專門店(第二分店)

圖：sophiawong0127

比起其他餐廳，呢間太安樓人龍小店完全就係以平取勝，$28就買到一碗海南雞飯同一杯冬瓜湯。但唔好以為平嘢無好嘢，雞肉夠滑而且已經去骨切條，食落啖啖肉零舍爽歪歪。而且三色醬料一樣無少到，鐘意食重口味嘅人記得嗌多醬。唯一要挑剔嘅係油飯嘅油香唔夠濃郁，不過望返個價錢，點都係收貨有餘嘅。
 

 
熟食中心有驚喜　　拿督星馬大飯店

圖：肥髀媽

要搵平靚正美食，當然唔少得要去熟食中心尋寶喇。呢間位於觀塘碼頭熟市場，招牌菜黑豉油撈麵有幾好食應該唔少人都知，但其實佢地嘅海南雞飯同樣食得過。雞肉真正做到皮香柔滑，連雞皮都入哂味，唔係普通雪藏貨。另一主角油飯就勝在軟硬度適中，食落有雞油同香料香。溫馨提示一句，檔仔環境始終無咁舒服，特別係夏天會比較悶熱。
 

滋味無骨海南雞　　西貢金雞海南雞

圖：mandy_m1n

呢間海南雞飯總店喺西貢，而九龍城、荃灣、北角同深水埗都有分店。雖然佢地賣嘅係新加坡式嘅海南雞飯，但特別在佢地嘅套餐奉送嘅唔係雞湯或者冬瓜湯，而係住家Feel嘅南瓜湯。而雞肉亦先去骨，入口嫩滑有肉汁，仲有得揀要唔要去皮，夠哂細心。油飯加咗乾蔥，食落多一重香味。

文：Cathy