各位buffet迷又有新場去啦~ 話說大人細路都啱玩嘅海洋公園間酒店新開幕啦，即係代表住又有新嘢食，其中一間係buffet餐廳~ 環球海鮮梗係唔少得，呢度嘅海鮮仲全部都係經認證嘅可持續發展海鮮嚟添。而且，一入去你就會見到超大個自動旋轉雪糕機，入面嘅Movenpick、Haagen-dazs等都係任食！！

成個buffet分左幾大區：海鮮、刺身、凍肉、沙律、熟食、肉類、甜品等，即刻同大家「高呼」下有咩食先~

開場個個都係立馬衝去海鮮區，個海鮮山離遠望到已經好吸引，有珍寶蟹啦、長蟹腳啦、波士頓龍蝦啦、翡翠螺、青口、海蝦、蜆等等，全部都係可持續發展嘅海鮮嚟，而最多人捕住嘅一定係蟹蓋，超多膏啊，仲好鮮甜，幾乎每次都係一出就被秒搶。

壽司同刺身區選擇亦多，包括有赤蝦、帶子、吞拿魚、希靈魚之類，全部都好新鮮。

肉食獸就梗係要去肉食區啦，分別有凍肉同烤肉，即切嘅烤肉眼、烤羊排都幾入味。

熟食區中嘅主食，首推就係蒜蓉粉絲蒸帶子啦，又係秒速消失嘅item。另外仲有串燒呀、燒味呀咁。

每日有唔同嘅燉湯，開飯仔去嘅呢日就係海底椰燉豬展，滋潤啊。

等咗咁耐，終於到你哋嘅「主菜」啦，即係甜品呀科科。最OP肯定係部自動旋轉雪糕機，好大部，好多雪糕啊，個個見到都變晒bling bling眼啦。仲要係Movenpick、Haagen-dazs，同iscream喎，好多款口味啊，前兩者唔多介紹啦，iscream嘅開心果味都好值得一試，好軟滑。

甜品都有好多款，細細件嘅cheesecake仔又有，花花裝飾嘅cupcake又有，蘋果金寶、麵包布甸、咖啡焦糖燉蛋布甸、奶凍同埋蛋糕sss都有。呀，仲有一樽樽軟糖，啱晒甜魔怪。要特別講下佢有張甜品枱，特登set矮咗，方便小朋友都可以自己夾到嘢食。

如果你係無酒不歡嘅朋友仔，加少少錢就可以無限任飲酒精飲品同各類果汁、汽水，甚至連即調cocktail、mocktail都有，聽講遲啲仲可能會加多部日本生啤機添呀。

每位入座都會免費送客slow cook鮑魚啊。

BTW，而家經OpenRice訂座仲可以順個靚便儲埋亞洲萬里通嘅飛行里數添啊留意返。至於酒店入面嘅其他餐廳，下星期再同大家介紹。

海灣餐廳及海灣咖啡室
地址：黃竹坑黃竹坑道180號香港海洋公園萬豪酒店海灣地下

文：Kar
相、片：Tom Li