位於何文田勝利道呢間老牌熱狗店，相信附近嘅街坊都唔陌生，最近餐廳去埋尖沙咀開分店，食物、餐牌都同本店一樣，不過呢邊裝修就大玩港式懷舊風，牆壁上嘅海報、擺放嘅雜誌、掛鐘、一枱一櫈以至播放嘅音樂都好有舊香港風味！
這個處於店舖當眼位置的六十年代時鐘，由店主Joy親自到古玩店搜羅。
話晒都係熱狗專門店，能夠仡立咁多年當然有佢嘅優勝之處。講個包先，熱狗包向相熟嘅麵包工房攞貨，全人手製造，每日新鮮運到。至於熱狗腸就喺一間由一位叫Mr. Karl Konrad Pschorr嘅德國製肉專家主理嘅香港廠房拎貨，據講要擁有呢個學位足足要讀成十年！
香蔥豬柳腸熱狗
店舖主要供應熱狗，鍾意叫埋套餐配薯條薯餅或淨腸都無問題。香蔥豬柳腸以豬肉為主，用牛天然腸衣，黑椒味重，油炸後加上用沙律醬炒香嘅洋蔥，甜甜鹹鹹幾滋味。
更多【新店直擊】： |
脆皮煙肉火腿腸
唔食牛嘅朋友可以試呢個脆皮煙肉火腿腸，以豬肉及雞肉製成，全條足足有26cm長，外皮香脆帶鹹香。有五款醬汁畀大家自由揀，包括茄汁、芥辣醬、酸瓜醬、沙律醬及BBQ醬。鐘意單一口味或落晒五款混醬都無問題，而且頭四款都係自家製㗎，味道天然。
波板芝士腸
想就咁食腸都得！將芝士腸捲成波板形狀，可以打卡之餘做小食就啱晒！
德國肉餅包、瑞士切肉牛角包
肉餅純牛肉，由形狀有如一條方包嘅德國大肉餅切成，味道偏鹹。而瑞士切肉牛角包同樣由一條粗香腸再切成一片片，兩者同樣配上洋蔥芝士就無咁膩啦！
地址: 尖沙咀亞士厘道18號地下
文: Yanica
相、片: Tom Li