呢排台式牛肉麵好hit喎！繼何超蓮引入玖五牛肉麵後，藝人傅珮嘉（Maggie）同老公主理嘅三星台菜食堂，亦啱啱於灣仔開設首間分店，分店以noodle bar形式經營，以麵食為主，不過就有灣仔分店限定花雕牛肉麵同蛋餅，即刻睇睇老闆娘親自介紹先！
傅珮嘉與丈夫Steven
問到點解揀灣仔開店？Maggie稱：「選址灣仔廈門街，因為覺得呢度曾經係一個好有歷史、故事嘅地方，但亦有新地標同新餐廳，有種新舊融合的氣氛。不過因為呢邊客源以附近返工人士為主，所以餐牌較簡單，有招牌牛肉麵及少量小食，冇台式飲品及小菜，唔夠銅鑼灣店種類咁豐富。」
但係灣仔店就有限定花雕牛肉麵，專登過來試！選用台灣埔里名產花雕同紹興酒，兩款酒mix埋一齊，配上店子熬製嘅濃郁牛骨湯，食落有酒嘅醇香之餘亦帶甜度，酒味唔會過重或偏苦，真係飲晒落肚都唔過份。配料就同三星牛肉麵一樣，有牛𦟌、牛筋及牛肚，麵條可以揀幼麵，找來灣仔著名老店鏡記粉麵廠合作，口感更幼滑。
埔里花雕牛肉麵 $88
酸菜任添，溏心蛋（$15）亦係新增配料
灣仔店另一限定為台灣早餐店常見嘅蛋餅，原來因為傅佩嘉鍾意食，以前住台灣時，老公Steven每日都會揸電單車出去買俾Maggie，好sweet啫。餅皮由台灣運來，加蛋煎香，質感Q彈，有三款口味，包括自創嘅酸菜牛肉、好有台灣風味嘅九層塔香腸，以及甜味花生醬Nutella。
九層塔香腸蛋餅 $38
花生醬Nutella蛋餅 $38
酸菜係自家炒製，用來配牛肉特別夾，再加上台灣醬油膏，好香口，而且食落唔會好膩。如果三款都唔啱心水，亦可以喺17款配料之中揀三款自己配搭，包括菜甫、粟米、芝士、焢肉等。飲埋本地名牌出品公和豆漿，就好似去咗台灣食早餐咁！不過蛋餅其實只於下午茶時段（3pm-4:30pm）供應，唯有當係飯後小吃。
酸菜牛肉蛋餅 $38
地址：灣仔廈門街7-17號百旺都中心地下A號舖
文、相、片：Perrins