又到轉季嘅時候，好多餐廳都開始推出全新秋冬主題嘅下午茶套餐，大家又要揀定靚衫，準備去打個卡、enjoy下啦！以下介紹幾款特色下午茶畀大家，有充滿少女味，以花作主題嘅下午茶，亦有少見嘅火鍋下午茶。不過開心還開心，大家都要記得保持社交距離，做足防疫措施啊。
火鍋下午茶 寬巷子
呢個都係三層架下午茶呀！不過三層架上嘅唔係鹹甜點，而係火鍋配料！台灣人氣火鍋店寬巷子最近推出火鍋Tea set「午後•百艷茶宴」，當中包括兩款人氣湯底供選擇、特色三層火鍋料、玫瑰高山清茶同埋全新推出嘅甜品——現代版鳳梨酥。三層架嘅頂層有三朵由上等牛肉卷成嘅玫瑰，中層就擺咗五款台灣地道小食，其中不得不提墨條牛軋，師傅喺入面加咗墨魚汁、花枝漿同雞軟骨等同牛軋糖完全扯唔上關係嘅元素，創新得嚟又幾有驚喜～而最底層則係插到靚一靚嘅蔬菜組合。
供應時間：即日起，每日14:30 - 17:30（需提前一天預訂）
價錢：$580（兩位）
魚子醬下午茶 La Rambla
想對自己好啲，就可以諗諗La Rambla今個秋冬全新推出嘅Las Perlas下午茶，可以一試頂級魚子醬餐點啊！每份下午茶包括一份30g嘅Kaviari頂級Baeri Caviar魚子醬～唔使驚唔夠喉，一系列嘅時令西班牙鹹點亦有加入魚子醬，其中招牌炸油條外層鬆脆，餡料十足。而4款甜品同樣充滿西班牙風味，好似churros同士多啤梨撻等。望住維港美景咁嘆頂級魚子醬，夠晒chill。
供應時間: 即日起 至 11月30日，每日15:00-17:00
價錢： $800／兩位（另收加一服務費）
傲遊意國下午茶 Cucina 
冇得飛，嘆返個以意大利美食為主題嘅下午茶，就當快閃咗轉啦～馬哥孛羅香港酒店意大利餐廳Cucina推出最新意國下午茶set，足足有12款鹹甜美點。意籍總廚選用地道意大利食材，將意國唔同地區嘅傳統食材加入茶點，例如杏仁、開心果、羊奶芝士等。其中，杏仁就融合埋鴨肝製成馬卡龍，甜而不膩；西西里嘅開心果亦製成口感幼滑、果仁味香嘅開心果慕絲朱古力球！
供應時間:星期一至五15:00-17:30，星期六、日及公眾假期 15:30-17:30
價錢： $508／兩位，連指定飲品兩杯（另收加一服務費）
黑鑽珍珠下午茶 Garden Lounge 
好多朋友仔都鍾意飲珍珠奶茶，行街成日都忍唔住想買杯，而家可以坐定定慢慢飲啦！美利酒店嘅Garden Lounge聯乘珍珠奶茶專門店圓貝，推出健康輕盈嘅黑鑽珍珠tea set。龍蝦沙律杯底有活性碳珍珠同腰果乳酪；黑芝麻抹茶杯就整到好似杯珍奶咁，香濃嘅綠茶忌廉夠晒綿密，配上甜甜嘅珍珠，好有口感。另外，下午茶仲提供純素烤餅、鬆餅同純素珍珠奶茶飲品，後者用天然食材同自家製手工珍珠整架，咁健康，終於可以放膽食返次～
供應日期及時間：即日起 至 11月30日,每天14:45-16:30、16:45-18:30
價錢: $ 678 / 兩位
訂座優惠：正價85折單點餐牌
花香果漾下午茶 大堂酒廊 (九龍香格里拉大酒店)
花除咗香同好睇，仲可以食落肚。呢間酒店聯同法國護膚品牌Darphin推出以牡丹、山楂同洋甘菊等植物元素做主題嘅花香果漾下午茶，配搭各種時令食材設計甜點和鹹點，又健康又滋潤。其中，值得推薦嘅有鴨肝凍配山楂及車厘子醬，同洋甘菊浸龍蝦配橄欖油魚子醬，龍蝦散發住淡淡甘菊清香，簡直係味覺、嗅覺、視覺三重享受～凡惠顧呢個下午茶，仲可以獲贈限量Darphin皇牌護膚體驗套裝乙份（數量有限，送完即止）添~
供應日期時間： 即日起 至 11月30日，每日下午15:00-18:00
價錢: $628/兩位，包括咖啡或香茶 (另收加一服務費)
「嚐燕．絮語」下午茶 one+one café & bar 
one+one café & bar乘聯GLYCEL推出嘅下午茶以紅色和白色為主，令人諗起浪漫嘅冬日。下午茶包括五款甜點同五款鹹點，全部甜點都加入女士恩物——燕窩，滋補養顏，夠晒矜貴。例如馬卡龍除咗夾住金箔白酒啫喱之外仲加埋燕窩；酒店人氣芒果拿破崙嘅變奏限定版，士多啤梨味加埋燕窩，層層酥脆，酸酸甜甜。鹹點雖然冇加燕窩，但配搭新鮮，好似炸蝦餅會伴西瓜沙沙汁咁。凡享用兩位用下午茶，每位顧客仲可免費獲贈GLYCEL尊貴體驗裝乙份，兼憑禮品換領卡兌換現金電子禮券等多項禮品。
供應日期時間：即日起 至 12月31日，星期一至日15:15-17:00
價錢: $ 458/兩位 (包括兩杯特飲)
文：Hailey
編：Kar