最近買新鮮蔬菜又貴到一個點，但就見番茄、洋蔥呢類貨都算補得快，而洋蔥又易煮又有營養，買定幾個放屋企配合唔同肉類都可以煮出好多種變化！之後無論係要禁足、家居隔離、WFH，定係依然要返工帶飯都有啖好食！

1. 牛肉飯

 自己整嘅牛丼未必似足日式連鎖店10成，但就啱晒個人口味囉

雖然我估其實絕大部分煮婦都識煮，但遁例都照講吓😂——視乎屋企人同自己有幾大食啦，一般嚟講我都預備1磅肥牛for大概4-5人份左右。先炒香洋蔥再直接放牛肉上鑊（唔需要事前醃定），圍住個鑊倒一圈味醂、一圈清酒同一圈日式醬油（平時用唔完啲壽司豉油都可以），煮一陣就可以上菜！鍾意嘅仲可以配多份半熟蛋或泡菜，搵隻大碗裝起外表都有八九成似日式連鎖店ver.！

2. 豚肉生薑燒

 圖：stepcwing、shopify
(左): 識煮之後去日式餐廳就好少再叫😂  (右)：呢個醬絕對係非常重要

呢個餸我哋屋企都平均一個月最少出現一次（冬天會密啲，生薑感覺特別暖胃嘛），因為要預備嘅嘢同牛肉飯其實差唔多，但叮飯出嚟超級香！豚肉就建議買豬腩片，貪佢翻叮唔會乾柴，但如果真係好怕肥就買豬梅肉片啦。豬肉片落豉油、糖、酒（清酒或紹興酒都冇咩所謂）最少醃一個鐘，煮時照舊落洋蔥炒香先，再倒晒啲豬肉同醬（精髓）落去煮就得！我就鍾意再另外加兩大湯匙薑蓉落去，食落薑味重多少少更好送飯❤️

3. 洋蔥柚子蜜豬扒

 柚子蜜除咗飲仲可以用嚟煎豬扒

同上面煮法都係咁上下，豬肉買豬肉眼或豬梅肉扒都得，醃法一樣（我自己就鍾意切定粒先醃，視乎想大大啖咬落去定方便一啖放入口啦）。煎香洋蔥之後落豬扒，煎到兩面都上色就可以瘋狂倒柚子蜜（唔使溝水），煮到豬扒熟晒就食得！溫提食之前搵水浸鑊先，如果唔係啲蜜糖攤凍後有機會漿實隻鑊㗎😵

4. 番茄洋蔥肉碎

呢個餸神奇嘅地方在於只要調校一下濃淡味，夾下唔同配料，就可以有勁健康同邪惡仔嘅極端感覺，而且跟飯或意（薯角就……唔太建議）都OK！4-5人份嚟講，1-2個洋蔥、300g-1磅免治豬肉加4個番茄加一罐罐頭番茄（切唔切碎版都冇咩所謂）或者意粉番茄醬就差唔多。煮法係先醃免治豬肉（都係嗰啲調味料啦）一個鐘以上，爆香洋蔥之後倒豬肉落去，邊炒邊加啲鹽、香草同黑椒（想要健康版就唔好落黑椒）。之後再落埋切好晒嘅番茄，倒埋罐頭番茄/番茄醬落去，加啲糖試一試味，想甜啲茄味再濃啲就再落茄汁。健康版就煮返15分鐘左右就上得，加隻煎蛋就可以直接送飯/意粉食；邪惡版可以煮耐少少，淋上意粉/飯上面再加幾片芝士同黑椒焗一焗😈

5. 洋蔥薯仔蛋餅

材料需要4-5隻蛋、2個薯仔、1個洋蔥、芝士同煙肉粒，芝士同煙肉粒可以唔落或者自行搵替代品都得。成個過程最難嘅任務就係處理薯仔，如果你冇信心可以切得薯仔絲夠薄（可選擇用刨）又或者純粹係想食到薯粒感，就建議先烚/蒸/叮熟薯仔，之後再將薯仔切絲或切片（洋蔥都就切絲/粒）。

牛油細火開鑊，將薯絲/片放落細鍋入面鋪底，煎一煎再落鹽落黑椒（如果有蒜鹽/香草碎果啲都可以加甚至取代），之後加少少蛋漿，凝固緊時再落洋蔥絲/粒同其他配料。一層一層重複做法，最後放隻大碟上小鍋上倒轉就可以好似成個蛋糕咁倒出嚟！

文：Apple
編：Kar