最近大家都多咗留喺屋企，個個都自己煮，唔通個個都識自己煮咩？好在坊間唔少餐廳同網店幫大家準備咗一系列煮食包或者套餐，分量啱啱好，而且處理好或者調咗味，簡單加熱或者煮熟就得，輕輕鬆鬆就可以完成大餐！
平昌 韓燒外送套餐
喺屋企都可以食韓式燒肉，呢間正宗韓燒專門店推出「韓燒外送套餐」，最正係可以借埋爐具！基本套餐足2至4人享用，有齊前菜、燒物、蔬菜、熟食同飲品，可以再另加牛魔王拼盤或海龍皇拼盤呀。
訂購方法：食客需一日前透過Whatsapp預訂（5688 1986），並以電子支付方式付款，專人會將食物連同爐具及配件送到府上
牛角 日式燒肉帶回家
有韓式當然唔少得日式燒肉，呢間連鎖店就推出「帶回家燒肉」，選擇非常多元化，懶得諗嘅話可以揀一人、二人、四人套餐或者燒肉六品盛合，唔同部位嘅牛肉、豬肉、雞肉、前菜、沙律等亦可以單點，連牛角飯都有得揀㗎！
訂購方法：親臨分店或者網上預訂 - https://qrgo.page.link/z5LFV
響 - Hibiki 日本燒肉 澳洲和牛、海膽直送到家套餐
想食得好啲，佐敦呢間日式餐廳就推出澳洲和牛、龍蝦、海膽套餐，顧名思義一個套餐有齊唔同部位嘅澳洲和牛、豚西冷、馬糞海膽、特選刺身、熟食龍蝦、沙律、海鮮豆腐湯等等，好豐富！而且可以加購燒肉專用爐，屋企食燒肉都特別有Feel呀。
訂購方法：透過Whatsapp（5998 5133）或致電（2886 5528）訂購，並以電子支付方式付款，惠顧兩款套餐或以上可享送貨服務，或選擇外賣自取
Double Chefs Market 牛肉涮涮鍋/燒肉套餐
由兩位日式料理主廚主理嘅網上食材專門店，套餐有日式涮涮鍋、壽喜燒同燒肉等選擇，最貼心嘅係配套都齊全，好似涮涮鍋會包埋自家製昆布鰹魚湯，唔同部位嘅牛肉、稻庭手打烏冬同芝麻醬，燒肉仲Mark埋每款肉要燒幾耐，入廚新手都無有怕啦。
訂購方法：網上預訂 - https://www.doublechefsmarket.com.hk/
華小屋料理 和牛壽喜燒外賣
喺屋企嘆壽喜燒不是夢啦。銅鑼灣有間日式料理餐廳，提供和牛壽喜燒外賣，連日本雞蛋同壽喜汁都有，好方便！叫個二人前set，就有齊前菜、和牛、野菜拼盤同稻庭烏冬，夠晒豐富，和牛仲有兩款選擇添~ 澳洲純和牛就肉味濃啲，日本佐賀和牛（牛肩肉）呢啲油脂就香啲。
訂購方法：網上預訂 - https://bit.ly/3c16iZy
霜月 Shabu Shabu套餐
呢間主打高級壽喜燒及火鍋嘅日式餐廳亦推出外賣自取Shabu Shabu套餐，想食牛味濃郁嘅優質美國牛肉，或者入口即融嘅日本鹿兒島A5和牛都得，配時令野菜、甘醇馥郁嘅秘製湯底同醬汁，留意返套餐最低消費係兩份牛肉唷。
訂購方法：訂購及查詢熱線 - 2321 3555 / 2321 5155
牛涮鍋 精選火鍋套餐
呢間日式Shabu Shabu專門店同樣有「帶回家」系列，分「獨食難肥1人餐」、「齊齊分享2人餐」同「豐盛4人餐」，同時亦有一系列肉類、蔬菜、海鮮可以單點，湯底仲有五款，有辣有唔辣任君選擇。
訂購方法：親臨分店外賣自取或用指定手機程式，查詢 - https://bit.ly/2vSALJX
燒房焗 招牌麻辣美食
呢間日式串燒店嘅特色就係一個字：辣！餐廳喺一個本地購物平台上架兩款食物，真係麻辣東風螺係招牌菜，即開即食，雖然麻辣但辣得夠過癮；麻辣豬手足300g，用熱水浸10分鐘就食得，豬皮爽滑、入味醒胃。
訂購方法：好生活網站訂購 - 真係麻辣東風螺 https://bit.ly/3abYBPY；麻辣豬手 https://bit.ly/2QBsaT0
French Lab Ready-To-Eat法國菜
睇名都知道係法國菜餐廳，日前推出一系列Ready-To-Eat嘅即食食物，好似法式油封鴨腿、普羅旺斯燉牛頰肉、法式龍蝦海鮮批等，聽落好複雜但大部分都只係需要大家浸熱水加熱或者煎熟就得，放心當然會連埋指示教大家要加熱或者要用咩火煮幾耐啦。
訂購方法：網上預訂 - https://forms.gle/VJMF6AQkF7fWukZC7
AMMO 外賣材料包
法國菜唔啱仲有意大利菜，餐廳由曾於米芝蓮星級餐廳任職嘅專業意菜總廚羅駿熙主理，揉合意大利及日本嘅食材與特色，最近推出外賣材料包，當中包括已經處理好同調味嘅食材加醬汁，Step by step就可以輕鬆完成星級菜式！
訂購方法：致電餐廳（2537 9888）預訂後，親臨自取、外送（滿$300需加$80運費，滿$800可享免運費）或用指定手機程式
Morton's of Chicago 精選自取牛扒套餐
屋企變扒房都得！呢間嚟自芝加哥嘅美式扒房首次推出自取牛扒套餐，二人套餐有兩份6安士免翁牛柳、5安士深海龍蝦尾、配菜、甜品，而且細心地附上餐廳招牌調味、自家製濃汁、新鮮大廚沙律，同由餐廳牛扒專家提供嘅詳細烹調指引。亦有4-8人嘅Ultimate Grill套餐，以及Butcher Block單件牛扒選擇。
訂購方法：一日前致電餐廳（2732 2343）預訂
金所 白布烏冬一人前
日本達人Meter年初將日本群馬縣名物白布烏冬帶嚟香港，自家製作保證新鮮，口感煙韌滑溜！最近餐廳推出白布烏冬家麵版，每包都係一人前，包括白布烏冬、醬汁同配料，仲有埋短片教大家點煮呀。暫有鰹魚醤油（冷麵）、鰹魚湯雞肉配料 （沾麵）、鰹魚湯鴨肉配料（湯麵）三款口味。
訂購方法：Facebook PM Meter Chen 網上訂購
TASTING TABLE Japan Premium 和式料理餸菜包
呢間網店主打款日本冷凍食品，包括海鮮、肉類、蔬菜等，以「安全，可靠和美味」為宗旨，將新鮮食材冷凍處理，鎖住鮮味亦方便保存。唔少料理餸菜包除咗可以喺屋企食，亦好啱做便當菜式！好似汁煮漢堡扒、唐揚雞腿肉。仲有即叮即食嘅蛋包飯、米漢堡等。
訂購方法：網上預訂 - http://tastingtable-japanpremium.hk/
家常例湯 滋補湯包材料
想飲返碗湯水滋補下但又唔想飲叮叮湯包，自己煲都唔難！因為呢間小店就係主打家常湯水，將大部分藥材同材料按配方Pack好。不過就要自己準備部分鮮肉，例如瘦肉或者烏雞，而且部分材料需要浸發或者處理，注意要預留時間呀。
訂購方法：網上預訂 - https://www.souppapa.com/
懶人自熱海鮮粥底火鍋 船渦
呢間主打一人一蒸氣鍋嘅餐廳，推出呢個自熱海鮮粥底火鍋。呢個$138吏部尚書套餐包括六款海鮮及粥底，另外仲包埋兩款肉類、丸類及蔬菜拼盤。先倒入粥底後放入發熱包，然後加水到指定位置，迅速將海鮮餐盒放入自熱盒內，15分鐘後就可以享用。海鮮包括白蜆、大蜆、蝦、魚片、鮑魚、元貝或蟶子，都好新鮮而且粥底鮮甜！唔想食粥亦可以亦可改做麵底。
訂購方法：可經OpenRice外賣自取服務下單
文：Cathy、Kar、Yanica
圖：Tom、餐廳提供或官方網站截圖
