「禁吧令」自上星期五生效後，最大影響除咗係一眾酒吧業界嘅朋友外，相信仲有熱愛啤酒嘅啤迷。雖然有部分餐廳仍然能夠提供酒精飲品，但一嚟有得飲嘢嘅地方少咗，二嚟始終都係留喺屋企飲安全啲嘛。有見及此，有多間酒吧餐廳、酒廠相繼推出「外賣啤酒」服務，令一眾啤迷即使喺屋企，都可以飲到接近喺舖飲嘅生啤，一解酒癮。

真空啤酒機  Tipsy Tap

尖沙咀呢間酒吧餐廳，一向深受手工啤迷歡迎，佢哋更擁有全港惟一嘅「啤酒外賣系統」，就係由俄羅斯引入嘅真空啤酒機。呢臺真空啤酒機會先喺樽內打入二氧化碳，令樽內維持真空狀態，避免因氧化改變咗啤酒嘅味道。斟嘅過程完全密封，封好蓋後，就放入保溫袋，啤迷直接拎走又得，喺屋企落單等直送又得，得咗。

送到屋企嘅手工啤酒，最多可以保存7日，但當然愈新鮮飲就愈好啦，倒出嚟仲有氣有泡㗎！IPA、Stout、酸啤等等全部都有得揀，最新上keg嘅有果味濃郁嘅酸啤Redwood 2018（Wild Beer Co）同順滑甜香嘅黑啤Silent Whisper（Brewski）。講多樣嘢你哋聽，外賣2支有9折，4支免運費，6支仲會送杯添！

高質保溫瓶   Blue Supreme

上環呢間酒吧餐廳係餐廳牌照，可以繼續營業，不過佢哋亦有提供外賣新鮮手工啤酒嘅服務。啤迷可以自攜器皿，或者選用餐廳提供嘅雙層不鏽鋼保溫瓶（買又得，畀按金又得）或雙層不鏽鋼杯裝走，分別係2L同600Ml，由美國製造，其中個growler仲可以保冷12-24個鐘添，就算住到幾遠，返到屋企啲手工啤酒依然係冰凍嘅狀態。

Tap頭上嘅手工啤酒有local同外國嘅選擇，除咗大家都熟悉嘅Carbon Brews、少爺、heroes等品牌外，呢排仲有比較少地方飲到嘅Symmetry，Mala Jiang Ginger Beer，呢款一聞落就有好濃烈嘅薑味，飲落微辣爽口。

入罐外賣   掌門精釀啤酒

 圖：餐廳官方Facebook

來自台灣嘅精釀啤酒店，最新引入咗一部罐裝機，斟入啤酒後隨即新鮮入罐、封蓋。餐廳暫定4月17號先至開返門營業，呢段期間，就有幾個指定日期返舖供應外賣啤酒，啤迷mark實4月10、15號呢兩日落舖喇。

愛好酒花香嘅朋友當然要揀佢哋嘅Double IPA啦，雙倍嘅酒花香味爆發，甘中帶香。不過要留意，IPA唔放得耐，要盡快飲啊！

入罐外賣   The Madhouse Taproom

 圖：餐廳官方Facebook

旺角呢間主打外國手工啤酒嘅taproom，同樣新增外賣零售啤酒服務，20款on tap嘅craft beer同埋craft cider全部都可以入罐做外賣，拎到返屋企大約可以放3至5日。不過都係嗰句，愈早飲愈好飲！

鍾意飲過桶嘢嘅話，挪威Double Stuffed Bourbon Barrel Aged（Amundsen Bryggeri）就啱晒，呢款dessert beer好似Oreo同朱古力咁甜㗎。另外，Split Shift（Fierce Beer） 則係一款用咗成4款啤酒花釀製嘅IPA，香到不得了，微微苦咁啦。啤迷每日17:00至22:00期間，可以去到舖頭揀酒拎走~

酒廠直送   H.K. Lovecraft

 相片由酒廠提供

除咗酒吧做外賣生啤外，連酒廠都有提供呀。仲要係直接由酒廠內嘅keg頭入樽直送，夠晒新鮮！呢個「from brewery to home」嘅服務，由酒廠直接入酒落1.5L嘅保冷瓶內，每次送2個，總共送4次。飲完嘅growler，喺下次嘅送酒日時放喺屋企門口，酒廠就會換上另外2個入滿酒嘅新growler，全程零接觸，仲會送多隻靚靚嘅3D雕刻杯添。

酒款選擇包括佢哋嘅常設lager款式：Helles、Vienna Lager、Doppelbock、Rauchiber同Dunkel。每次叫唔同款都得㗎。Helles清爽、Vienna Lager順滑、Doppelbock甜香，即使係lager，都各有風味呢！

文、相、片：Kar