新滬坊
新滬坊菜式由主廚干曙光師傅主理，入廚25年嘅干曙光師傅一向悉心研製健康上海菜，佢設計嘅菜式既保留了傳統上海菜烹調嘅方法同神髓，亦減少使用油同糖嘅份量，令油膩感大減。干師傅除咗注重食物味道，對食物嘅賣相亦十分講究。
有機鮮蔬炒珍菌
由於有機蔬菜帶有天然甜味，所以經大火短時間爆炒後，加少少海鹽已經好夠味。食材包括雲耳、豆乾、秋葵、南瓜、杏鮑菇、秀珍菇及甘荀，食落既爽口，亦保留到蔬菜本身所含嘅水份和鮮甜。
豐年藏珍寶
香脆嘅鍋巴盛住炒香咗嘅自家醃製五花肉粒、雞頭米及青紅椒，菜式主要靠少許蠔油調味。配埋以烏龍茶泡嘅清雞湯，食完一啲都唔會覺得鹹或肥膩。
原味豆漿浸勝瓜
呢道菜主要想食番食材本身嘅鮮味。材料簡單，只有勝瓜、杞子及豆漿，先將勝瓜刨皮後稍為煎香，現代人注重健康，平時都鍾意白烚蔬菜，如果唔想太單調，可以試試用豆漿浸蔬菜呢個方法，味道會更豐富。
地址：灣仔港灣道1號香港會議展覽中心1樓
電話：2582 7332
營致會館
營致會館於2018年獲米芝蓮二星榮譽，由行政總廚蕭顯志師傅主理，餐廳同樣實行少鹽少糖理念。
珊瑚芙蓉水晶蝦球皇
主角大花蝦爽脆鮮味，加入鮮蟹肉、蟹膏及蛋白，味道層次更豐富。最後以上湯、少量鹽、糖及麻油打番個芡，口感更滑。
竹笙松茸燉菜膽湯
想飲番碗清新啲嘅湯水，呢道竹笙松茸燉菜膽湯係不二之選。選用野生竹笙，加入松茸、白菜及上湯燉十小時，上湯以上好火腿、老雞及赤肉熬成，肉味較濃。
金湯上素石榴球
南瓜湯加入忌廉，味道香之餘，口感更滑。石榴球嘅餡料包括多種菇類，只係加咗少量調味去帶出菇菌本身嘅鮮味，而用生粉及澄麵製成嘅外皮亦煙煙韌韌。
地址：中環干諾道中41號盈置大廈地下G05、107及108號舖
電話：2801 6882
嘉麟樓
嘉麟樓由行政總廚林鈺明師傅主理，菜式少鹽少糖，希望顧客食番食材本身嘅味道。
魚湯蛋白蒸蟹鉗
選用三斤以上嘅肉蟹，因為蟹肉較厚身、緊實及鮮甜。將蟹鉗生拆後放上蛋白蒸，最後淋上用魚湯、蟹殼製成嘅茨汁調味，茨汁只加了少許岩鹽，蟹肉同魚湯嘅鮮味完全滲入蛋白中。
蟲草花炒鴿脯
炒鴿脯係以前富有人家先食到嘅菜式！師傅先將鴿片煎香後，再用上湯炆至入味，所以唔使落咁多調味枓。再加入炸得香脆嘅蟲草一齊炒，口感就更加豐富。
金盞果仁畔水芹香
呢味餸同樣都係食番蔬菜本身嘅味道。食材包括馬蹄、水芹、法國蘆筍及夏威夷果仁。每一種食材都好新鮮，加入夏威夷果仁，就更有畫龍點睛嘅效果。
地址：尖沙咀梳士巴利道22號香港半島酒店1樓
電話：2696 6760
* 資料由客戶提供