KUMAMON嘅FANS可能已經一早收到風，知道嚟緊會有間大型超巿做主題限定。終於畀你哋等到啦，呢間超巿聽日就會正式進駐將軍澳東港城，開店初期會有好多KUMAMON造型食物呀！
以芝士蛋糕聞名嘅呢間舖，喺佢哋嘅cake面印咗KUMAMON個嘜頭落去，輕易就俘虜到粉絲嘅心。
佢哋仲會率先推出北海道芝士雪糕芭菲，將日式芝士蛋糕變作雪糕新鮮口味，而海塩芝士奶蓋綠茶各方面嘅平衡度亦調得唔錯，飲嗰陣記得傾斜少少飲先可以一啖飲到晒咁多隻味呀。
佢哋嘅朱古力蛋糕係成隻KUMAMON頭呀，得意到都唔知咬耳仔先，定係食咗面豬先好。
另外最強主打當然係cremia雪糕啦，新界東嘅朋友唔使特登入港島搵食喇以後。軟雪糕嘅牛奶味超重，因為係用咗北海道鮮奶油同高乳脂肪12.5%調配而成呀，至於甜筒係白之戀人嗰隻餅嚟㗎，超鬆化。
要醫肚嘅仲可以食埋班戟，夏威夷果仁醬或者自家製綠茶味紅豆蓉都唔錯呀。後者係用班戟粉加綠茶粉整出嚟，所以成塊pancake都有淡淡嘅綠茶香味。
呢間台式茶飲店都變咗做café式嘅小店，除咗有茶飲同雪糕，仲有首次推出嘅蛋卷，分別係鐵觀咅味同抹茶味，面頭仲有張KUMAMON膠貼紙添。鐵觀音味係用茶粉溝埋落忌廉度再一齊打發，茶味香濃。暫時係得呢間舖先有得賣咋。
呢間歐陸式甜品店，除咗有15款比利時雪糕同埋多款法式蛋糕之外，仲有cute cute嘅KUMAMON朱古力軟心蛋糕同牛油曲奇。
落足眼力周圍行，仲可以捕獲到勁多KUMAMON呀！好似茶碗蒸、壽司、米甜麵包、酒、麵等等。
BTW，呢個超巿超大，分咗好多唔同區，有兩個一定要講下嘅，一個係全港首設於超市入面嘅日本清酒Bar、另一個係由德國百年歷史品牌VomFass開設嘅油醋Bar。
先講日本清酒Bar，唔止有好多清酒賣，直情可以坐喺度慢慢品嚐，仲有品酒師駐場介紹同交流品酒心得添。極限量嘅十四代本丸、角新純米吟釀等等同埋N Sake都有得賣呀，其中，N Sake全港得200支㗎咋，而十四代本丸就帶有雲呢嗱嘅甜香，好清純，辛味唔算重，女生都啱飲。
油醋、酒Bar個setting都好靚呀，一個個醋油器皿、酒瓶同威士忌酒桶擺晒喺度，全部都可以即場試飲。醋品果味天然醇和，而油品亦係以當造果實冷壓研磨、真材實料限量初榨，可以用嚟配沙律或者煮食。墨西哥辣椒油、法國普羅旺斯香草油同牛肝菌菇油仲係今次季節限定，得呢度有得賣咋！
一田超巿
地址：將軍澳東港城2樓
文、相、片：Kar