可能係牛魔王最期待嘅畫面出現啦！全新概念牛角Buffet即日起登陸旺角，全日唔限時段都可以用一個價錢任食燒肉，按食物選擇數目同肉嘅質素分五種級別，再加任食Buffet Zone有多款前菜、沙律、甜品同飲品都係自助任食。點揀好？嚟睇開飯仔介紹啦！
 

五個級別全介紹 

熊本縣豚腩肉 

Lv.1入門級係日本熊本豚放題，可以任點熊本縣豚腩肉、熊本縣豚肉眼、多春魚、牛油粟米等共23款美食。熊本黑豚肉肉質軟嫰，富油脂香。
 

美國見島特選和牛肩脊肉 

牛舌 

Lv.2係美國見島特選和牛放題，可以任食美國見島特選和牛肩脊肉、美國見島特選和牛一口牛、牛舌、石斑魚柳等共48款美食。肩脊肉大理石花紋相當誘人，食落充滿肉汁。而牛舌亦有嚼口而唔過韌。另外值得一提嘅係Lv.2開始可以任點炸雞塊同炸薯角，係其他牛角分店無㗎！
 

美國SRF極上和牛板腱肉 

美國SRF極上和牛一口牛 

Lv.3係美國SRF極上和牛放題，選用美國優質牧場SRF直送和牛，可以任點美國SRF極上和牛板腱肉、丹麥皇冠豚扒、牛油帶子、吉列炸蠔等共75款美食。板腱肉口感相當鬆化，油花充足。一口牛嘅肉汁更多，富牛肉香而且無咁肥膩，最啱鍾意食牛肉香味嘅牛魔王。
 

澳洲M9和牛肩脊肉 

Lv.4係澳洲M9和牛放題，用嘅係澳洲Blackmore M9和牛，脂肪分佈平均。可以任食澳洲M9和牛肩脊肉、上級牛肋肉、廣島蠔同車海老等共92款美食。肩脊肉牛肉香味更為濃郁，油脂香亦非常突出。唯一扣咗少少分嘅係筋位多咗啲，唔夠入口即溶。
 

日本玉名黑牛牛肋肉 

最高級Lv.5係日本熊本玉名黑牛放題，比Lv.4多咗三款日本玉名黑牛牛肋肉同三款日本玉名黑牛一口牛，可以任點共98款美食。玉名黑牛以優質嘅牧草飼養，務求令油花更為細緻平均。牛肋肉燒過後脂香十足，鬆化甘香，最啱鍾意品嘗和牛油花嘅牛魔王。
 

美食自助區+特別食法

惠顧任何一款放題都可以到美食自助區任食前菜、沙律、燒野菜、飲品同甜品。而且識得靈活運用嘅話，可以令燒肉有更多變化！好似可以去攞自己鍾意嘅可麗餅、野菜、泡菜同醬料，之後用可麗餅連同燒肉包埋一齊，就係自製嘅燒肉可麗餅啦。
 

而甜品區嘅銅鑼燒、窩夫同泡芙其實亦可以燒過再食，用中火輕烤兩邊就得。開飯仔覺得銅鑼燒燒過之後最香，再加水果粒，甚至加埋雪糕嚟個冰火刺激都得，得咗。
 

而午市亦有60或100分鐘，共15款午市定食選擇，一樣可以享用美食自助區，最平嘅定食都係$69！而如果夜晚都想食平啲啲，可以考慮特設嘅早、夜割優惠時段。最後長氣啲都要提醒大家一句：雖然係放題，但記得食得哂先好嗌，咪做大嘥鬼呀。
 

全日放題餐牌及價錢：https://bit.ly/2s4uzJW
午市放題餐牌及價錢：http://bit.ly/2JbYWrj

牛角Buffet
旺角彌敦道639號雅蘭中心2樓209-213號舖

文、相、片：Cathy