德國相機品牌Leica日前喺銅鑼灣白沙道開設旗艦店，集相機店、藝廊同Cafe於一身！旗艦店增加本土元素，所以Cafe由裝修到餐牌設計亦融入香港特色。好似以鹹檸七為靈感嘅特飲、特別版菠蘿油等等，無論係相機發燒友定係鍾意相機食先嘅Foodie都好啱嚟試下！
 

Cafe Leitz由Leica同孖人廚房主理嘅Interval Coffee Bar合作引入，亦係全球第四間分店。環境開揚，配合品牌同旗艦店裝修黑色金屬為主，同時加入懷舊特色，好似舊式向上推嘅玻璃窗、灰白色格仔紙皮石地磚等。主打精品咖啡、創意飲品同輕食，Menu會大約兩三個禮拜轉款，保持新鮮感。
 

Espresso Lime Tonic（$55）

以茶餐廳鹹檸七為靈感，呢杯Espresso Lime Tonic唔單止用咗青檸，仲特別加入自家製鹹檸檬，而喺Tonic中倒入Espresso，令咖啡表面產生一層好似生啤咁嘅幼滑泡沫，增加口感層次。味道亦非常特別，有齊鹹檸檬嘅鹹味、青檸嘅酸味同咖啡嘅香醇，多重交織。
 

Pour Over（$70）

手沖咖啡可以自己選擇單品咖啡豆，品牌從世界各地搜集香港較為少見嘅品種，不定期更換，最近就有嚟自哥本哈根同台灣嘅咖啡豆。今次開飯仔試嘅係台中Solidbean Coffee Roasters嘅水洗Ethiopia咖啡豆，手沖的確帶出Tasting Note標示、類似益力多咁嘅酸甜乳酪味，隨著溫度降低好似青檸咁嘅酸味會更突出。
 

Latte（$42）

其他咖啡會選用House Blend，品牌綜合Costa Rica、Honduras同Ethiopia三地咖啡豆，調出帶莓果酸味同堅果香嘅咖啡。唔單止咖啡豆用心，咖啡機亦係名牌La marzocco。當然，對Leica Fans嚟講，最特別嘅係Latte Art上嘅Leica Logo，同黑色紙杯上面嘅經典紅點標誌！
 

 

紅豆菠蘿油（$42）

雖然Cafe細細，但亦有供應唔同嘅糕點配咖啡。菠蘿包係搵品牌合作開嘅Baker供應，客人Order後會翻熱，再加上自家製紅豆蓉同牛油。靈感當然嚟自茶餐廳經典菠蘿油，再加上中式甜品常見嘅紅豆，味道微甜唔會蓋過牛油嘅香味。
 

店中亦有售賣由韓國糕點師Claire Kim主理品牌Claire de Lune嘅創意糕點。
 

Cafe另一邊係藝廊，第一個展覽係本地資深攝影師Bobby Lee以中國粤劇為題材嘅攝影作品。可以一邊享受咖啡香，一邊欣賞。
 

Cafe Leitz
地址：銅鑼灣白沙道12號地舖

文、相、片：Cathy