好多人都覺得食飯一定要大啖食肉先夠盡興，但中環區呢間全素嘅中餐廳可以改變你想法。心齋一直以新派嘅烹調手法炮製非傳統素菜，店內所有菜式都唔會有蛋、奶、五辛（大蒜、蔥、薤、韭菜、興渠）同味精；之前仲獲知名飲食網絡平台選為全球25大素菜餐廳第18位。

最近為咗迎接冬季，餐廳推出全素火鍋，唔好以為食素火鍋一定好清，店內以各種珍貴菌類為主打。湯底方面都有好多選擇，如黑皮雞樅菌湯、香茜鮮茄薯仔湯，惹味啲就有近年好興嘅麻辣鍋同冬蔭公湯。

麻辣鍋加咗豆瓣醬、老乾媽辣椒醬、花椒、泡椒同子彈椒等調味。湯底本身就附有四川粉條同凍豆腐，麻辣鍋湯底又香又麻，而且唔會覺得好油。冬蔭公湯用素高湯、南薑、香茅、冬蔭公醬等材料熬成，平時嘅冬蔭公湯都會加埋海鮮去熬，雖然呢度就無，師傅話冬蔭公主要靠唔同嘅香料同冬蔭公醬，所以湯底食落就同平時食到嘅無咩分別。

都係想食清淡啲嘅，可以試下呢個黑皮雞樅菌湯同香茜鮮茄薯仔湯，黑皮雞樅菌湯本身附有竹笙同黃耳，呢個湯主要想比食客食菌嘅原味，黑皮雞樅菌好爽口，食之前記得飲返啖湯！

材料方面就以各款特色菇菌類做主打，羊肚菌係一種珍貴嘅野生菌類，對腎臟好同有健脾等功效。榆耳片就因為纖維較細，所以有便秘問題食嘅人就最啱。另外仲有百靈菇同鮮竹笙等選擇。全部菇菌類菇味香濃，而且仲吸哂湯好入味！

對於平時食開葷嘅人嚟講，都有菜餃、素包心丸、素蝦丸同素蟹柳過下口癮，菜餃會用時令蔬菜製成，所以每次食都會有唔同～

飲品有特色黑麥汁同鮮果汁揀，醬料區方面建議可以試下花椒油，食落有陣陣花椒香氣，好惹味！價錢方面跟據湯底而變，大約二百幾蚊就可以任食Menu上嘅野(特色菇菌類除外)，以半山區嚟講算好抵食！

心齋

地址: 半山花園道51號科達中心3樓

文：Yanica

相、片：Tom Li