冬天成日打邊爐，好似燥熱咗少少喎？飲返碗燉湯補一補，又熱又暖心~ 返工太忙冇時間自己煲都唔緊要，而家各區都開多咗好多主打燉湯嘅小店，為各位「無飯家庭」提供純天然、不加味精嘅靚湯！
原個椰子燉湯 椰小盅燉湯專門店
講到滋潤靚湯，一定有椰子燉湯份！呢間以原個椰子燉湯嘅小店，今年仲入選「米芝蓮街頭小食推介」添~ 湯水都採用椰子水製作，好鮮甜~ 仲加咗上長白山人參、鮮鮑魚同織金竹笙子嚟燉，咁足料，夠晒滋補～
米芝蓮豬肺燉湯 信得過
呢間燉湯店喺2018年獲得「米芝蓮推介」，主打豬雜，專揀十個月大嘅乳豬，bb乳豬食嘅飼料比較簡單乾淨，所以內臟都比一般嘅乾淨，而且鮮味更出。嚟到必飲嘅杏汁白肺湯，香甜嘅杏汁味，配上新鮮嘅豬肺，冬天飲就夠晒潤啦！
24小時燉湯 湯直送
圖﹕RS12
凌晨放工總係想飲碗靚湯，這不再是夢！呢間燉湯店24小時營運，而且都係足料燉湯，不加味精。包括蟲草花栗子燉素湯、花旗參淮山燉去皮雞、五指毛桃燉唐排等，又大盅又足料。堂食定外賣都得，做到幾夜都有湯飲啦~
打工仔最愛 大湯家
滋潤靚湯一向都係打工仔嘅恩物，而呢間位於觀塘嘅燉湯店最啱晒打工仔放lunch去啦！佢哋嘅燉湯每日新鮮熬製，材料全天然。提供茶樹菇排骨燉湯、椰子烏雞排骨燉湯等，而栗子香菇淮山烏雞燉湯就最受歡迎，有濃郁嘅栗子香味。餐廳除咗有堂食燉盅，仲提供不銹鋼保溫壺外賣，畀咗按金後兩星期內歸還就ok啦！
中環時尚燉湯店 湯譜
圖﹕呢間位於中環嘅燉湯店，乍眼一看似一間coffee shop，但其實賣各式滋潤健康燉湯喎！燉湯至少燉足三個鐘，款式由老闆自己研製，例如花膠燉鮮奶湯、黑蒜螺頭燉湯等；黑蒜螺頭燉湯嘅黑蒜味濃郁、甘甜，而螺頭口感軟腍，一飲落肚馬上消除一日嘅疲倦。
文﹕Kiko
編：Kar
