中菜八大菜系中，上海、潮州菜都係以多功夫見稱，今次要介紹嘅呢兩間中菜餐廳，都有好多手工菜式，更難得嘅係破除咗一般人對出街食中菜就係油膩嘅感覺。

翡翠拉麵小籠包 （分店地址按此） 

全港有多間分店嘅連鎖上海菜館，自2002 年起進軍香港，都就嚟廿個年頭，一直深受家庭客歡迎。餐廳一方面主打傳統京、川、滬傳統菜式，另一方面亦配合而家香港人推崇嘅少鹽少油烹調方式處理。而且，唔少菜式都相當花功夫下，例如蘭州手工拉麵係師傅即場即點即拉。

百步香蔥油餅

一客兩件嘅百步香蔥油餅以傳統手法製作，由師傅人手逐個逐個包。外層鬆脆，內餡包有香蔥同火腿，啖啖都食到香濃嘅蔥味，鹹鹹香香。值得一讚嘅係比想像中冇咁油膩啊。

自選3式拼盤 （雞絲粉皮、涼拌溫室小青瓜、鎮江排骨）

想試多幾款前菜嘅，可以叫個自選3式拼盤。推介鎮江排骨、雞絲粉皮、涼拌溫室小青瓜嘅配搭，有肉有菜夠均勻。雞絲粉皮係最受歡迎嘅前菜之一，每條大約2-3 mm厚嘅粉皮晶瑩剔透，配搭差唔多厚度手切雞絲，口感甚佳，入口陣陣麻醬香。涼拌溫室小青瓜選用日本小青瓜，先以鹽辟走草青味，再混入蒜蓉同麻油等，爽脆香口；至於鎮江排骨則選用肋排部位，加入鎮江醋冰糖、紅米等製作，酸酸甜甜，作為前菜幾開胃。

火腿烤雙方

經典菜火腿烤雙方所需嘅功夫甚多，準備時間要超過5個鐘頭，就連選材亦相當嚴謹，師傅透露金華火腿只會揀約3年嘅火腿，而且仲要係最幼嫩、最細緻嘅部位，八九斤火腿中大約只有一斤四兩左右啱用。火腿面層塗上嘅桂花以糖浸過，入口鹹香中滲清甜。工序最繁複嘅就係腐衣，仔細數嘅話會數得出每塊有6層腐衣，蒸完又要吹乾才可備用，難怪特別鬆脆。夾埋青瓜一齊食，口感更見豐富。

傳統東坡肉

一般大眾對杭州名菜傳統東坡肉嘅印象都係肥豬肉，感覺較肥膩。不過呢度嘅東坡肉感覺冇咁油膩。師傅特意選用層次分明嘅腩心部位，配以由冰糖、生抽、老抽、花雕等調成嘅醬汁，先用慢火燉兩個鐘，再轉用細火蒸一個鐘，慢慢迫出酒精同油分，令到入口時既有花雕香味，亦有肉汁。

鱔糊炒拉麵

又係一道坊間已經好少搵到嘅心機菜。鱔糊炒拉麵選用細條少少，但口感會爽脆啲嘅黃鱔。由師傅人手拉嘅拉麵，口感煙韌，每條麵條甚至芽菜，都沾滿晒濃郁帶甜嘅醬汁，好惹味。

翡翠潮州小廚（分店地址按此） 

翡翠飲食集團旗下另一個品牌，主打潮州地道風味，融合傳統同現代嘅烹調技巧，製作滷水、小菜同潮州粥等。幾間分店嘅座位都寬敞舒服，無論係家庭定朋友聚會都好適合。

滷水鵝片

餐廳專誠聘請咗一個有30幾40年經驗嘅滷水師傅返嚟，專職負責滷水出品，自家調製嘅滷水膽，混入咗八角、川椒、桂皮、甘草、陳皮等多種藥材及香料，係香口嘅。鵝片主要選用不見天、下腿肉嘅部位，啖啖肉香。

至尊滷水鵝拼盤

如果人多食，又ok食內臟嘅話，至尊滷水鵝拼盤就啱晒。一碟齊晒滷水鵝片、鵝件、鵝腸、鵝肝同鵝腎。全部都好入味，鵝腸彈牙爽脆，滷水鵝肝因為較難處理而坊間少見，師傅表示控制火候係令到鵝肝口感潤滑，近乎入口即溶嘅關鍵之一。

黃金糖醋麵

按照潮州做法嘅黃金糖醋麵，先以滾油炸至挺身，加入雞湯，滲透每條麵之後，再轉用細火烘3-5分鐘 至金黃色，達至外脆內軟嘅口感。食嗰陣，可按個人喜好隨意加上砂糖同陳醋 。

潮州蠔蛒

傳統嘅潮州蠔蛒會使用鴨蛋製作，不過師傅話基於健康嘅考量，餐廳就只係用雞蛋，冇用鴨蛋。半煎炸過嘅蠔蛒外層香脆，而且一睇就知用料十足，份份都漲卜卜，未夾開都見到有好多蠔仔喺入面，仲要粒粒都大大粒，好飽滿又juicy。

潮州方魚蠔仔粥

去親食潮州嘢，通常都鍾意叫返碗潮州粥，特別係方魚蠔仔粥。加入咗雞湯、方魚、酸菜、冬菇等熬煮，粥底多咗份鮮甜，蠔仔亦粒粒肥美。

心動不如行動！有興趣就快啲約埋三五知己去嘆下美食！快啲bookmark定啦！

*以上圖片只供參考，所有食品以實物為準. 食品供應因餐廳而異