由日本開到過嚟香港嘅呢間芝士蛋糕店，一直都好受芝士控嘅歡迎，而家仲追過日本，爬埋佢頭，喺旺角開設全球第一間嘅café添呀！Cheesecake固然之有得食啦，仲多咗各式鹹、甜嘅窩夫、芭菲同雪糕等等！

開新舖亦順勢推出新嘅芝士蛋糕口味，Tiramisu Roll意大利芝士卷。呢個cake就OP喇，由日本團隊親自研發，但淨係得香港先食到㗎咋。解構下先，有幾層嘅，最外面係薄薄地嘅crepe皮，輕輕食到少少酒香味，中間就係可可味海綿蛋糕，而核心嘅核心就係北海道軟芝士同朱古力忌廉。忌廉嗰層雖然薄，但咖啡味濃郁。暫時只係呢間舖有得食，其他區嘅分舖就要等下先喇。

做得café，當然有啲輕食可以坐低慢慢食啦。鹹嘅窩夫有3款：美式香腸雞蛋、白汁蘑菇雞肉，同日本芝蛋煙肉。窩夫可以揀原味或者蔥油味（由青蔥同紅蔥頭調製），伴埋沙律菜，感覺好豐富，brunch食啱晒。

而甜嘅都有3款：雜莓脆脆配北海道忌廉、北海道忌廉鮮果配軟雪糕 / 藍莓醬。雖然望落好多cream但唔使怕膩呀， 隻cream係Nakazawa Fresh Cream嚟，做開甜品嘅朋友應該會知，呢隻cream係全北海道牛乳製，香得嚟感覺較light。

芭菲有士多啤梨同芒果味，一紅一黃，超多果肉圍邊，喺側面睇就會見到成杯芭菲分咗幾層，由頂到底數落去，有雪糕、自家製海綿蛋糕、檸檬蛋白杏仁脆或紅莓白朱古力、北海道手打忌廉、粟米粒及椰汁糕，同埋果肉、果汁墊底。

成間舖最受歡迎嘅，唔使問，一定係軟雪糕！一款係北海道牛奶味，另一隻味有驚喜呀！芝士控，唔好尖叫！係北海道芝士味呀，唔止雪糕係芝士，連個cone都係用車打芝士整㗎！實行由頭到尾由內到外都係芝士芝士同埋芝士！係rich嘅，同埋個cone好好食，芝士味好突出。

但如果想一次過食多幾樣芝士嘢嘅，就要捨棄呢個cone，叫二重奏或者三重奏，咁就左一塊芝士曲奇，右一件cheesecake喇，雪糕仲可以揀要兩溝，牛奶芝士味都齊晒！

Cow Cow Cafe by東京ミルクチーズ工場
地址：旺角亞皆老街8號朗豪坊4樓8號舖
開業日期：12月9日

文、相：Kar