餃子係唔少香港人嘅comfort food，經濟得嚟好味又飽肚。喺香港都有唔少高質餃子店，有湯餃有煎餃，每日新鮮即製，除咗基本款仲發展出好多創意口味，如鹹蛋黃黃金餃、墨魚荸薺餃等。湯底都好有特色，有啲店舖更會用自家煲老火湯做湯底添。
創意黃金餃+土匪餃 餃子冰室
雖然遠就遠啲喺長洲，但呢間冰室有好多大家聽都未聽過嘅餃子口味！如鹹蛋黃黃金餃、五香芋頭臘腸餃、獨創南乳豆卜餃同黑白土匪餃等，入開去可以試下。黃金餃餃子一入口充滿肉汁，又食到鹹蛋沙沙嘅口感，不過因為鹹蛋關係比較易膩，食兩件就好夠喇。另外黑白土匪餃真係好似食緊土匪雞翼咁，好特別。
圖: sweetju.food
香甜南瓜湯底 木金餃子製作所
餃子即日新鮮包唔留過夜，一份八隻餃子可揀兩款唔同口味。大大隻鳳城蝦蝦餃，選用肉質爽嫩嘅中蝦切粒，加上木耳、胡蘿蔔等製作餡料，好有口感～黑松露芝士豚肉餃都好香濃。最特別係湯底供應如南瓜濃湯、紅菜頭蕃茄忌廉湯等特色濃湯。
圖: 晶瑩剔透手工餃 餃掂手工餃子雲吞專門店
人氣連鎖餃子店，招牌龍鳳松茸雙灼餃配狀元九鼎湯，啱晒鍾意食松露嘅朋友，可以同時試晒黑松露同白松露口味。跟配嘅狀元九鼎湯一啲都唔馬虎，加入粉葛、順德活鯪魚、香山活鰂魚、紅蘿蔔、扁豆、赤小豆、新會陳皮、蜜棗及鮮排骨熬成，鮮香味濃。
網民心中No.1 甜記餃子
網上投票第一名嘅人氣餃子店！煎餃皮被評為咁多間最薄，口味有招牌椰菜冬菇雲耳豬肉餃、少見嘅京蔥羊肉餃及南瓜忌廉雞肉餃等。湯餃嘅話仲有得揀番茄薯仔魚湯，飲晒成碗都無問題呀～
圖: 芫荽黨至愛 豐信餃子店
湯底係椰子海帶鮮雞豬骨湯，清甜又唔會搶咗餃子味。必食有椰菜鮮肉餃及芝士粟米鮮肉餃子，有濃濃既芝士味，另外仲有芫荽黨必食芫荽鮮肉餃！重口味朋友可以轉酸辣湯底，驚唔夠飽仲有得加麵呀。
圖: juillet
花膠淮山豬骨湯 永樂餃子店
一樣主打湯底嘅餃子店，呢間呢就係花膠淮山豬骨湯，湯底濃厚綿稠又鮮甜，好有家嘅感覺。餃子款式有13款，想食特別啲，可以考慮鮮肉粟米三色椒餃同鮮肉咖喱薯仔餃呀。
圖: pigfoodiexhk
超飽滿大大粒 餃子屋
荃灣嘅名物，每一隻餃子都做到好似拳頭咁大，男士們都一定夠飽！想試多款口味，就要試風味三拼，包括粟米、香菇木耳雞肉及三色椒餃，皮薄又足料！
圖: 為食MoJil
人氣墨魚荸薺餃 山東小城
因墨魚荸薺餃而聞名嘅餃子小店，外皮用新鮮墨魚汁製成，內餡就加入豬肉、新鮮墨魚滑同馬蹄，同時有墨魚彈牙同馬蹄清脆嘅口感，又有墨魚鮮甜，難怪咁受歡迎喇。
圖: rbylife
本地黑毛豬餃子 米亭 
標榜選用本地黑毛豬同100%香港製造，而且有好多特色口味選擇，好似川味麻辣、紅咖喱芝士等。冬天最啱食湯餃，佢哋嘅湯底就有特濃雞湯及花膠雞湯揀，兩者都好香濃呀～
圖: wingcc
特色尼泊爾餃子 Momoz
中式餃子就食得多，正宗尼泊爾餃子你又食過未？呢間尼泊爾餃子專門店由一位香港女生同佢尼泊爾老公開設，必食招牌爆汁雞肉饃饃，可選蒸或煎，肉汁豐富香料味濃厚，配上番茄辣醬更有風味，而爆汁豬肉饃饃可配芝麻花生醬～
圖: 文: Yanica
