龍蝦南瓜凍湯
前菜嚟講，有呢碗龍蝦南瓜凍湯。係，凍湯，首先校返你嘅expectation先，碗湯係凍嘅。成碗湯金黃色咁，未舀已經見到有3大條松葉蟹肉，大大嚿海膽同埋幾粒三文魚籽，忍唔住一定要畀相機食咗先。到我食喇，一舀落去，個質感又唔係想像中平時飲開嘅龍蝦南瓜湯咁蓉蓉地，反而係有啲凝住嘅狀態，我認我係離咗一離嘅，但飲咗一啖即刻就忍唔住要舀第二啖，南瓜同龍蝦成功完美融合咗，冇一絲絲嘅南瓜蓉但係就好滑，充滿鮮味同甜味，間唔時又咬到粒三文魚籽，都幾特別（好似咬到粒爆爆珠咁，但係粒咬開就有鮮汁彈出嚟嘅爆爆珠）。
煙燻鯖魚沙律
話明煙燻，就梗係有煙燻味啦（sor，魚有魚味啲friend），而鯖魚嘅肉質經過煙燻之後就更加結實同彈牙，淡淡然但又有些少鹹香，口感幾好，仲要係厚切嘅添。伴碟嘅新鮮野菜都幾爽，啖啖肉咁食返啲菜平衡返感覺上係冇咁罪疚感嘅。不過，就未必個個都鍾意食鯖魚呢種質感嘅魚生囉，嗯，唔食嘅朋友可以留返畀我，我食肉，你食菜都ok㗎。
雙色薄切
又話係得呢間舖先有嘅菜式？咪又係吞拿魚同油甘魚刺身？嗱，少年你真係太年輕喇，係，又係刺身，但係刺身配薑味沙律汁同橄欖油你試過未先？薄切嘅刺身各有4片，點上都幾重薑味嘅醬汁，係fresh嘅，原來刺身都唔一定要點豉油同wasabi嘅。
別格壽司
吸收咗上面薑汁刺身嘅經驗，就知道呢個九宮格壽司都係非一般嘅壽司，吞拿魚、油甘魚、帆立貝、火炙三文魚、中吞拿魚腩、活煮蝦、牛油果松葉蟹、千両壽司同鯛魚9款壽司，除咗分別配上黑魚子或者海膽之外，成碟仲有啲芒果汁同清新爽甜又帶有些少酸嘅細細粒柚子啫喱㗎，估唔到又幾夾喎，不過啲柚子啫喱真係太細粒，可能係我筷子功唔好啦，都幾難夾起，同埋，唔係好夠喉……
三文魚伴枝豆醬
喺主食方面，有兩道慢煮菜式，其中一道就係呢碟。潮流興慢煮嘛，不過日本菜做慢煮都比較少有。呢件三文魚扒，聽講係用攝氏42度低溫慢煮咗成三幾個鐘㗎，煮完出嚟之後都仲係咁鮮橙色，好似一嚿大三文魚腩刺身咁，但其實已經係熟咗㗎喇。用刀一切，嘩，如果你expect佢係硬身啲嘅就sorry喇，佢係超腍！而個底嘅青綠色醬就係枝豆醬嚟嘅，側邊仲有幾粒真‧枝豆同埋有露筍墊底，食落個感覺都幾新鮮幾特別。
炸流心玉子鰻魚飯糰
Last but not least（啲報告尾通常都要有呢句，好似係），呢道菜由外至內到返外都係咁吸引，外面係輕輕炸到脆一脆嘅飯，裡面就係半生熟度啱啱好嘅溏心蛋，咬開仲有少少蛋黃汁流出嚟，兩層中間就夾住一層真‧鰻魚條，外脆內軟，就算飽都忍唔住要食晒佢！
嗯，報告係咁多，冇咩事我去做運動先喇。
文：Kar
隨時接收最新資訊
讚好OpenRice專頁！
