怡紅院？仲有賣身契？見到咁別具一格嘅裝修，係咪以為自己穿越時空去咗古時風月場所呢？唔好誤會啊，其實呢度係中環新開一間以青樓為主題嘅火鍋店，樓高兩層，無論食物、飲品定裝潢都好有gimmick！
避風塘炒肉蟹鍋($488)
講到打邊爐湯底一定係靈魂啦，餐廳供應多款特色湯底，避風塘炒肉蟹鍋可以話係香港首見！先食蟹後加湯打邊爐。用上肥美大肉蟹，加生熟蒜炒香，炒肉蟹多肉惹味，加入湯後有陣陣蒜香同豆豉味。
養顏濃厚花膠雞鍋($398)
女士們唔可以錯過呢款花膠雞鍋啦～湯底加入豬皮、豬骨、8-10隻全雞、花膠同響螺等材料熬製6小時以上，味道好香濃！溫提打邊爐前記得飲返碗湯先。
燈紅酒綠($128)
其實就係麻辣鍋同芫茜皮蛋鍋嘅合體，呢度嘅麻辣湯同坊間嘅唔同，除咗十幾種香料外，仲加入自製當歸粉，味道特別濃郁。而芫茜皮蛋鍋可以話係一座芫茜山，滾一滾湯底都變埋綠色，芫茜控唔可以錯過！
另外配料質素都幾好，淨係牛肉都有成十幾款選擇。推介大家食唔同部位嘅騸牯黃牛，吊龍(大$388/細$198)肥瘦均勻，封門柳(大$368/細$188)就肉味重，而金花腱(大$288/細$148)就爽脆啲。牛胸尖($68)呢個部位平時都較少見，口感一樣咁爽脆！
自家製和牛餃($98)、自家製三文魚餃($98)、自家製雲吞($88)
呢度嘅特色餃全部都係自家製，加入和牛及三文魚等特別材料。和牛餃牛味重、肉汁豐富。
爆汁皮蛋貢丸($88)、爆汁牛筋丸($88)
食呢兩款丸嗰陣要小心啲啦，因為佢真係好爆汁！皮蛋貢丸內有皮蛋香同陣陣薑味，特別得嚟又幾好味。
午飯時段仲有供應套餐，有飯食有湯飲。呢個怡紅院炒飯加入雞肉、瑤柱同七味粉去炒，一啲都唔馬虎㗎。
另外地下嗰層仲有個酒吧，供應多款玩味Cocktail，如用茶壺裝住嘅無花果Cocktail同花樽外型菊花味Cocktail等。
地址: 中環雲咸街43-55號余悅禮大廈地下B-C號舖及1樓102-4號舖
文、相、片: Yanica