銅鑼灣開咗間新餐廳，有得玩又有得食！呢間餐廳有成8000呎咁大，一半係食嘢，另一半，係迷你哥爾夫球場呀！而且餐廳仲以fitness為主題，盡量提供高蛋白質但低碳水化合物嘅輕食。

呢個椰菜花牛肉漢堡包，係零麵粉㗎，係用椰菜花、杏仁粉、車打芝士等造成麵包，食落一樣有麵包鬆軟嘅質感。疊上一層牛肉、紅洋蔥、芝士、菜咁，個紅洋蔥都要特別講下，係用紅菜頭溝糖、紅酒醋咁預先落落洋蔥度令佢「上色」，單單一個包，都幾多功夫。而伴喺側邊嘅薯條，就係餐廳內少有提供嘅「邪惡」食物，混埋黑松露醬同黑松露油，係幾香口。

至於個名好靚嘅紅絲絨churros配奶油芝士（先要講清楚，唔係真係紅絲絨嘅質感嚟），切開churros裡面係粉紅色嚟，幾靚㗎都。同然都係用天然色素整成，啲粉紅色係嚟自紅菜頭濃縮咗嘅水再混入麵酵而成，幾靚。面頭再沾滿肉桂糖粉，甜得嚟有陣陣清香。

西瓜配碧根果再加埋feta cheese，雖然感覺夏天食會開心啲，但抱住冬天食雪糕夏天打邊爐嘅心態，其實幾時食都會enjoy。清爽嘅西瓜同唔太膩嘅芝士，作為前菜幾開胃。

 炸雞窩夫

呢度仲有個bar，有各式吸睛嘅cocktail，例如 Gentleman waiting for the lady咁，粉紅色已經令一眾女生心心眼，仲要側邊夾多束花，OP呀！不過好多女生可能飲一啖就會遞畀男生飲返，因為呢杯都幾重泥媒whiskey味。提一提，束住花嘅糖塊都食得，一上枱即食仲脆卜卜嘅添。

而另一杯都幾特別嘅係You are my cup of tea，都係cocktail嚟嘅，不過用英式茶杯上，面頭有層泡沫，係用西柚汁加大黃煮出嚟嘅糖水而製，而裡面就係將Earl Grey嘅茶包浸入whiskey度再溝埋日本柚子汁、grapefruit ginger等，飲落酸酸甜甜，微澀。

食飽飽過返隔籬場郁下啦~~ 咪睇少迷你哥爾夫球，都唔容易打呀。有兩個各有9個洞嘅推杆球場，唔同設計唔同形狀，有難有易，成班friend一齊玩一齊笑下都幾happy。

Strokes
地址：銅鑼灣Fashion Walk 京士頓街9號1樓G2-3號舖

文、相：Kar