古早味魯肉飯登陸觀塘！台灣食材帶出風味

香港人似乎對台灣餐廳有一份情意結，即使有請坐、程班長台灣美食、阿元來了、小時光、1963木十豆寸等台式餐廳，呢間開業只有幾日嘅台式餐廳已經深得觀塘區內食客歡心，午餐經常好快售罄！究竟呢間台式餐廳有乜咁巴閉？

舖頭由幾個女生主理，主打幾款台灣街頭常見嘅台式美食，例如魯肉飯、肉燥飯、米粉湯、黑糖刨冰等等，老闆之一嘅Garine強調，店內大部分嘅食材、配料都來自台灣，務求可做出正宗台式風味。

古早味魯肉飯($38)，每日大廚將五花腩、豬下脾切成肉粒，並以醬油糕、冰糖等配料一同熬煮兩三個小時，形成濃稠嘅魯肉汁。當收到客人柯打時，就會將濃濃魯肉汁淋上粒粒分明嘅米飯之上。

未食之前就已經聞到肥豬肉嘅陣陣油香，好邪惡！魯肉分量多，口感軟腍，非常香口，加埋台灣國民最受歡迎嘅「台梗九號」珍珠米，煙韌得嚟又吸收魯肉汁，味道一流。

古早味肉燥飯($36)，比起魯肉飯，肉燥飯就相對無咁油膩，因為當中以豬肉碎為主。少啲肥豬肉雖然少一份油香，但肉燥就多啲咬口，而且肉燥汁內加入咗蝦米，再連埋台灣生抽、醬油糕等食材一同熬煮，惹味得多。

惹味肉燥乾拌板條($38)，香港較為少見嘅台灣板條，形狀似河粉咁長而扁平，但食落好似潮州粉果層皮咁，有少少煙韌，食多幾條都幾有飽肚感。配以肉燥、韭菜、蒜泥、炸乾蔥、醬油糕及烏醋就大功告成。

祖傳米粉湯($34)，唔好誤會，唔係米粉加湯，米粉湯係以豬骨、雞熬煮出嘅高湯去煮米粉，煮到米粉碎成一小條一小條，接近好似粉漿咁樣架，最後加上胡椒粉及韭菜，令米粉湯更香。食嘅時候用匙羹就可以，如果唔夠味仲可以加入自家秘製辣椒油添！

相比起中式佛跳牆，呢個兩人份嘅台式迷你佛跳牆($78)雖然用材無咁華麗，但勝在非常足料，太足料反而被客人指唔夠湯水。入面有素翅、芋頭、栗子、冬菇、鵪鶉蛋、排骨酥、豬手及魚皮，湯水好清但飲落就好黏口，好似平時食到豬手嘅骨膠原咁，好豐富。

招牌黑白切（綜合）($168)黑白切，係咩嚟架？其實「黑白切」係台語嚟，意思即「隨意切」，舊時代嘅台灣人會叫小店店員隨便切一碟豬嘅部位嚟食，即指豬嘅內臟──豬雜！餐廳供應6款豬內臟，分別係豬蝴蝶腩、豬舌、豬心、生腸、嘴邊肉（即面頰）以及豬脆管（即氣管）。聽落有點兒那個，不過食落又幾好味喎，尤其是豬脆管，口感比豬軟骨更爽脆，最啱送酒。注意，每日限量供應！