又又又有台灣茶飲店嚟香港開分店啦，今次呢間來頭都唔少，喺台灣嗰邊有成200間分店，仲係上年台灣大學生票選No.1嘅手搖飲品專門店嚟！舖頭主打天然同手作嘅茶飲，珍珠唔係黑色，係白色嘅，冇加色素、冇加防腐劑，健康得嚟口感同樣煙韌。

茶飲選擇都唔少，當中最推介嘅一定係大甲芋頭鮮奶！芋頭味超香甜，芋蓉啖啖軟綿，奶香幼滑！原因係佢哋特地選用大甲區嘅檳榔心芋頭，再以電鍋手工燜煮同壓爛成蓉，全部都係工夫啊！

珍珠紅茶拿鐵都應該會係頗受歡迎嘅一款茶飲，採用伯爵紅茶底，加埋鮮奶同蜂蜜白珍珠，茶味香醇，唔澀口之餘仲有微微嘅佛手柑香氣，珍珠咬落煙韌，亦滲出甜甜嘅蜂蜜味。負責人透露，珍珠製作過程都絕唔簡單，以冷熱交替嘅方法去沖煮，再用蜂蜜同砂糖去浸泡，令到口感同味道都有所提升。

但講到最花心機嘅，應該就係佢哋嘅茶底喇。紅茶、綠茶等每桶茶底嘅處理方法，例如製作所需嘅溫度、浸泡時間、手搖速店等都唔同，雖然工夫多，但舖頭就堅持唔用煮茶機，全部都係人手工製作，因為人手先可以最適切咁按照溫度等變化而作出相應嘅調節。以紅茶為例，水滾加入茶葉後，先後以人手攪拌、沖泡兩轉，隔茶後又會再壓茶同打發，可以令茶葉濃度一致，充分吸收水分、散發出更香嘅茶味。手工茶每轉只可以少量製作，而且嚴格監控只可以喺6個鐘內飲用，所以飲到嘅茶湯都幼滑順口。

另外，柳丁綠茶就係為咗呢間分店而全新推出嘅，早前喺台灣一推嗰陣已經迅速賣清光，所以暫時都係得香港舖先有得飲咋。以台灣嘉義橙汁融入茉香綠茶，酸甜之中有啲微澀。

當然，鍾情抹茶嘅朋友仔，就可以試出雲抹茶鮮奶啦，怕甜嘅話可以要求少甜㗎。至於珍珠黑糖鮮奶應該就可以滿足到一眾甜魔嘅，啲黑糖都係舖頭每日新鮮手抄㗎。

迷客夏
地址：銅鑼灣利園山道17號地舖

文、相：Kar