鍾意食麵嘅朋友！山頂廣場最近新開一間麵食專門店，由台灣富豪飯堂喆園餐廳行政總廚梁華生擔任總顧問，唔少名人都係fans嚟㗎。餐廳主打各個國家特色麵食，但以台式為主，於台灣及上海設有分店，大部份食材由台灣運到，仍然keep到水準。
原味清燉雞湯麵配豉油雞
碗麵嘅靈魂當然係雞湯。餐廳用一部特製嘅機器將原隻雞連骨壓碎成湯，真係原隻雞嘅精華融入湯內，飲嘅時候有黏感，滿滿骨膠原，而幼細嘅台灣手工麵亦非常掛湯。
原味清燉雞湯麵可自選配豉油雞或松板豬頸肉，豉油雞係梁華生總顧問嘅拿手菜，唔少食客都係特登為咗佢嚟食。全部都係用台灣調味料，味道較甜，肉質嫩滑。豉油雞每日限定，想食就要早啲去啦。
金玡居拌麵
招牌拌麵嘅靈感其實來自西式意粉，以橄欖油為基底拌入白磨菇及櫻花蛋，食嘅次序都好講究。先食一啖原味拌麵，再將櫻花蛋同麵拌勻，味道即刻creamy啲，最後再拌入沾豬頸肉嘅泰式酸辣醬，又會清新同惹味咗。
麻辣臭豆腐牛肉麵
麻辣鍋同臭豆腐都係好出名嘅台灣食物，餐廳就將呢兩樣食物合拼，製成呢碗台式fusion麵。湯底係牛肉湯加麻辣，牛肉湯放咗大量牛腱肉及新鮮蔬水果熬成，麻辣味較溫和。而水煮臭豆腐雖然聞落唔臭，但食落有好香濃嘅臭豆腐味，臭豆腐控必食！
黑麻油松葉蟹湯麵
黑麻油松葉蟹湯麵由於時令關係，淨係供應到三月咋。湯底用鮮雞湯加上台灣黑麻油製成，香氣明顯，松葉蟹腳都好新鮮。
小食推薦宮保皮蛋臭豆腐及鹽酥雞，皮蛋臭豆腐同樣夠晒臭，而鹽酥雞亦皮薄香脆。
飲品方面都係誠意之作，宇治紅豆奶凍冰抺茶味濃郁，而且唔會過甜，花生黑珍珠燕麥冰同樣香濃，粒粒珍珠仲好有咬口添！
地址: 山頂山頂道118號山頂廣場1樓118號舖
文: Yanica
相、片: Tom Li