茶餐廳奶茶同台式珍珠奶茶大家應該都飲唔少，以名畫做主題嘅奶茶大家又飲過未？尖沙咀呢間主打摩登中國茶同素食嘅餐廳最近新推出一系列賣相吸引嘅外賣茶飲，唔單止打卡呃Like一流，茶底亦不惜工本加入茶餅同原片茶葉調配，加埋自家手造紫薯圓等配料，各位Tea Lover必試！
 

 
優質茶底+Mocktail沖調方法

茶底加入普洱熟茶餅及原片古樹紅茶葉，提升色香味

2DP新推出一系列特調茶飲，除咗名畫主題夠特別之外，茶底亦非常用心。同一般奶茶只用錫蘭紅茶唔同，茶藝師特別添加普洱熟茶餅同原片古樹紅茶葉，前者可以令紅茶顏色更濃而且香味更突出，後者就令奶茶飲落口感更厚身。之後再加古樹紅茶碎，特別之處在於最後會加少少濃香烏龍茶葉一齊煲，增添一份回甘！
 

雙色紫薯奶茶·17’s（配椰香忌廉雪山）（$32）

而製作呢杯紫薯奶茶嘅方法亦相當特別，同餐廳其他調茶一樣運用咗西式Mocktail手法，首先將新鮮紫薯同糖心黃肉番薯壓成蓉，再倒入冰粒、自家製紫薯奶及紅茶糖漿、奶茶、忌廉奶蓋，最後灑上椰子薄脆再用火槍輕烤，一上枱就聞到椰子嘅甜香！

開飯仔先飲咗中間嘅奶茶，入口順滑而且充滿茶香，顏色濃郁但比一般茶餐廳奶茶一樣有回甘，但少咗一份苦澀。撈埋紫薯奶同雙色薯蓉搞勻飲用嘅話，就會增加甜度同口感層次。而鮮忌廉奶蓋亦非常Creamy，成杯飲完其實都有少少飽。
 

打卡必影黑白漸層奶茶

咖啡伯爵奶茶·水墨（配竹炭忌廉雪山）（$32）

另一杯賣相吸引嘅就係呢杯以水墨畫為靈感嘅咖啡奶茶，配搭同茶餐廳嘅鴛鴦有異曲同工之妙，但味道層次就分明得多！奶茶以帶佛手柑香味嘅伯爵茶為茶底，Highlight位係特別加入新鮮薰衣草添加花香。而特濃咖啡就加入竹炭營造水墨效果，鮮忌廉奶蓋上面一樣有加金箔點綴。

打卡之後記得先搞勻再飲，先品嘗到特濃咖啡嘅香味，之後茶味會慢慢湧上嚟，最後薰衣草嘅花香充滿口腔，係一杯有驚喜嘅茶飲。
 

每日手造紫薯圓+桂花糕

由甜品師傅手造紫薯圓

鍾意有啲咬口？無問題！呢度嘅飲品都可以額外添加紫薯圓、芋圓、桂花糕粒、桃膠等配料，前三款更加係由餐廳甜品師傅每日新鮮自家製。好似紫薯圓就要先將紫薯壓成蓉，加木薯粉同糖後手搓，煮完仲會過冷河，令紫薯圓口感更彈牙。
 

玫瑰古樹白茶拿鐵（$28）加自家製紫薯圓（+$6）

開飯仔就揀咗呢杯有機茶Latte嚟加紫薯圓，白茶嘅清香同玫瑰嘅花香平衡有致，不過唔知係咪因為花香比較濃郁嘅關係，對比之下紫薯圓就食唔出紫薯甜香，勝在口感彈牙，而且味道天然唔會過甜。
 

古早桂花糕粒

士多啤梨雜果古樹紅茶（$32）加古早桂花糕粒（+$6）

而呢杯雜果紅茶同樣足料，唔單止上面鋪滿士多啤梨、奇異果、橙等水果，杯底仲有搗碎咗嘅雜莓，味道集水果嘅甜香同古樹紅茶嘅餘韻於一身。加埋桂花糕粒就更有口感，邊飲邊食滿足感十足！反正呢度嘅調茶全部無加奶精同茶精，而且都係低糖配方，飲多幾杯都唔會有罪惡感啦。
 

2DP
尖沙咀厚福街12至12號A藍馬商業大廈地下

文、相：Cathy