作為beerholic，識飲梗係飲手工啤酒啦！今個週末有一場手工啤酒活動Craftaste，雲集本地六大啤酒商，將自家釀製同外國品牌啤酒一次過show hand，包括外國流行嘅酸啤、蜂蜜酒、加入唔同口味嘅啤酒等，唔單止酒有酒味，甚至有甜味果香等等，而且由$10起即可試飲，即睇有咩特別推介先！

外國大熱酸啤、大麥啤當道

外國大熱嘅酸啤（lambic beer）試過未先？呢款係比利時一款傳統啤酒，以天然酵母及細菌放入木桶發酵帶出酸味。本地少爺啤酒廠推出亞洲首款自釀酸啤Days of being Wild，有櫻桃酸香，富層次感。

試埋Tipsy Snake引入比利時嘅Kriek de Ranke及Oude Geuze，真正體驗咩為知酸啤嘅極致！前者混合車厘子，果香濃郁。後者係非常著名嘅酸啤，用陳釀1年、2年及3年啤酒混合，帶有如芝士般發酵味，非常複雜。就如榴槤、臭豆腐同藍芝士一樣，陣味實在太「獨特」，唔係人人都接受到...

其他啤酒亦傾向放入木桶陳釀提升味道及香氣層次感，好似Peated Oak Aged Embrasse係將Dark Ale放入Islay威士忌木桶陳釀4至6個月。亦有放入橡木桶、紅酒桶嘅款式，玩法千變萬化。

少爺嘅花釀年華，加入三種花釀製，桂花香氣最突出！黑麥啤酒Rye on Wood，同樣放入橡木桶入面熟成，帶焦糖麥芽、香料味。

亦有多款來自美國The Bruery嘅特色手工啤，包括橡木桶酸黑啤、檸檬車厘子酸啤、Bourbon木桶熟成白朱古力啤同帶橙香、可可及雲呢拿味嘅Imperial Stout。

Moonzen酒廠Barleywine ale於農曆新年期間推出兩款大麥啤，其中一款放於紹興酒酒埕中陳釀，令啤酒有黃酒嘅拖肥、焦糖香甜味。

女仔最愛香甜蜂蜜、蘋果酒

唔鍾意飲啤酒嘅，通常原因都係：「啤酒好苦」。以下呢幾款蜂蜜酒同蘋果酒直情甜到漏，男仔女仔都啱飲架！Monster Craft引入美國多款甜酒，包括用蘋果及藍莓釀成嘅Blueberry Spaceship box、帶花生醬味嘅Lagrimas de Oro、芒果味Necromangocon等，非常香甜易入口。

呢兩款就似啤酒啲，左邊為加入胡桃果仁及雲呢拿豆嘅小麥酒，右邊成杯橙汁咁嘅，係加入大量啤酒花但帶水果果味嘅Spellbound double IPA，以IPA嚟講，算係易飲。

夏天最緊要清爽

嚟緊夏天，冇理由再飲重口味嘅啤酒，清爽型嘅啤酒就最解渴又易入口喇！首推Heroes Beer Co嘅Zamboni Beer，為冰球賽特別釀製嘅Cream Ale，口感順滑清爽，適合入門者飲用。而另一款Si L Dan IPA，與自釀啤酒專門店HK Brewcraft合作，原材料啤酒花隨意加，飲落有啤酒花香又唔會太濃。

新出拉環可以將成個蓋拎起，令啤酒香氣一下子散發出來，飲得更爽！

當日活動只接受電子貨幣，先用網頁登記，以信用卡top-up即可買酒。當然有罐裝、支裝亦有draft生啤，價錢最平$10/100mL起，大部分都只係$20，鍾意飲幾多自己決定！

Craftaste

地址：九龍灣MegaBox L5 Achacha Food & Beverage Boutique

日期及時間：27/4 5:30pm-11pm，28/4 12nn-11pm

入場費：$150包玻璃杯一隻及$40 token

文、相、片：Perrins