講起瑞典，你會諗起啲咩美食？我諗絕大部分人都會即刻諗到肉丸（meatball），跟住呢？瑞典駐港總領事館最近舉辦「A Taste of Sweden 」活動，推廣一系列瑞典傳統美食，除咗肉丸之外，仲有好多㗎！參與活動就有機會食個免費pizza或者贏得餐飲優惠。

瑞典肉丸

肉丸絕對係瑞典嘅傳統美食之首啦，佢哋嘅肉丸製法有好多，純雞肉純牛肉嘅又有，但更多嘅係混和豬肉牛肉製成，每個家庭都會有自家製嘅秘方。通常都會配埋肉丸汁、薯蓉同埋越橘果醬一齊食，食落有肉汁之餘，口感亦彈牙。

蝦醬吐司(Toast Skagen)

由瑞典名廚Tore Wretman發明嘅蝦醬吐司，通常會喺大大小小嘅party中見到佢嘅蹤影。發展到今時今日，又係各家各戶都會有唔同嘅方法去製作，但大致上離唔開上層係蝦仁伴醬汁，下層係cracker或者法國脆麵包，一啖一塊，都幾開胃。

瑞典公主蛋糕

如果你有去過瑞典旅行，應該會成日喺啲蛋糕店嘅櫥窗度見到呢款青綠色，大大個，仲有朵玫瑰做點綴嘅蛋糕，瑞典人好鍾意㗎。呢個叫瑞典公主蛋糕呀，外層係杏仁蛋白翻糖，而中間就會係幾層海棉蛋糕加忌廉，係幾軟熟嘅，不過就略為偏甜咯。

瑞典Västerbotten芝士批

身為芝士控，係要試下世界各地唔同嘅芝士嘅。瑞典呢款幾特別㗎，有極度濃烈嘅非一般鹹香，建議配襯埋雲莓果醬一齊享用。雲莓醬酸酸甜甜，正好中和返芝士批嘅特強濃味。

肉桂麵包/荳蔻麵包

呢兩款包都係瑞典街頭麵包舖常見嘅包點，但做法絕對唔簡單，由搓粉、發酵、烘焗等要成4-5個鐘。口感軟熟，肉桂味夠突出。而荳蔻嗰款嘅層次更為複雜，有好濃嘅香料味，鹹甜辛辣等味道都有。

 新任瑞典駐港總領事 歐思誠

雖然而家冇得飛，但喺香港都有唔少以瑞典菜為主題嘅餐廳可以試到以上嘅菜式，有啲更係由瑞典人開設嘅添，夠晒地道。只要喺活動期間，去指定店舖或餐廳消費同打卡，就有機會贏到多款瑞典美食/餐飲優惠，例如免費瑞典午餐、肉丸、pizza等等。

A Taste of Sweden
參與餐廳包括：Frantzén’s Kitchen、來自瑞典的肉丸先生、squarestreet KAFFE、SverigeShoppen、Swish Pizza

期間限定：即日起至11月30日

文：Kar
相、片：Tom Li