於香港開業超過四十年嘅老牌印尼菜峇里餐廳，最近選址佐敦山林道重開。餐廳有別於以往傳統風格，裝潢大玩時下最hit嘅文青咖啡店風，落地大玻璃配上木色傢具，掛上一盞盞異國風味嘅吊燈，增添不少印尼氣息。至於食物方面仍然保留一貫傳統菜式， 亦有供應幾款創新fusion菜，適合唔同年輕層嘅朋友嚟嚐試！

吃不停口．巴東牛肉A.O.P牛角包 ($38)

巴東牛肉飯係印尼傳統菜式，而餐廳就將巴東牛肉作牛角包餡料，坊間嘅巴東牛肉好多時都會選用牛冧肉或牛腩，肥膩感較重，而呢度就用牛展，入口腍身又唔會太肥，醬汁就加入石栗、月桂葉、椰汁及香茅等製成，味道香濃，配埋青瓜食又多一份清新感。

不變．招牌巴東牛展肉金貝飯 ($73)

想食返傳統印尼菜，當然唔少得招牌巴東牛展肉金貝飯，金貝飯即係黃薑飯，少啲功夫都做唔到。先用新鮮黃薑醃四小時，蒸一次，然後用椰汁、香茅、斑蘭及檸檬葉醃製後再蒸多次，前前後後要用六小時製作，金貝飯食落會有椰香及淡淡香料味道。配埋惹味巴東牛肉食就啱啱好！

沙爹炒豬肉飯 ($63)

鍾意惹味啲嘅要試吓沙爹炒豬肉飯，將梅頭肉切絲後加入洋蔥及沙爹醬炒香，梅頭肉用芫茜籽及香料預先醃製，配埋沙爹醬更濃郁。

雙色咖央多士 ($28)

咖央多士加入牛油及咖央醬，最值得一提係咁色彩繽紛嘅麵包，餐廳特意搵麵包廠自家製，真係加入食物元素製作，如紅色就係紅菜頭、黑色就係竹炭味道。

特製峇里式串燒 ($42)、羊肉 ($32)

峇里島傳統特色串燒SATE LILIT，造法好多變，餡料用肉或海鮮都可以。呢度就用魚肉及蝦混合打成膠，再加入紅蔥頭、蒜頭及香茅等香料，口感彈牙。

人見人愛．加多加多 ($58)

家喻戶曉嘅印尼菜，會用一啲有口感嘅食材如豆角、雞蛋、青瓜及薯仔，最特別係加入加多加多花生醬，材料有花生醬、椰糖及石栗等，有花生香氣，味道偏甜少少 。 

峇里堂珍多公雞冰冰($51)

平時喺香港飲開嘅珍多冰都係一杯杯，原來印尼傳統嘅傳統珍多冰都係以碗呈上，同朋友分享都無問題！

峇里堂  

地址: 尖沙咀彌敦道176號The Nate3樓

文、相、片: Yanica