滋滋聲嘅牛形鐵板、金黃色嘅波浪紋薯條、顏色豐富嘅甜品香蕉船，呢啲都係唔少香港人回憶中嘅港式豉油西餐。最近呢間有49年歷史嘅港式平民扒房去到荔枝角一間商場開新分店。除咗有招牌西式扒餐之後，仲多咗唔少食物選擇，無論係一支公、情侶檔，定一家人去食都總有好選擇！
 

新分店新選擇

金鳳大餐廳喺香港已經有49年歷史，第四間分店落戶荔枝角D2 Place。因為商場裡面有唔少親子餐廳，週末亦會有手作市集，菜單選擇上都加咗唔少新菜式，例如雜錦炸物小食拼盤（$78）、（香蒜白酒/忌廉汁）煮藍青口（$70）、卡邦尼帶子扁意粉（$78）等。而裝修亦特別參考返舊式扒房，好似圓拱背景牆、紅色釘皮梳化、淡黃嘅燈光等。睇得出心思。
 

胡麻醬雞肉沙律（$68）

唔好以為扒房就一味得肉食，其實想健康啲都有唔少多菜選擇。金鳳馳名羅宋湯（單點$38）其實係素菜湯，以多款蔬菜熬出鮮味。而沙律亦有多達7款選擇，胡麻醬雞肉沙律嘅胡麻醬調味得宜，撈埋雞肉同沙律菜食特別開胃。而且上枱嘅時候隻碟係凍㗎，夠細心要加分。
 

松露醬鮑魚帶子片扁意粉（$95）

飯同意粉亦有唔少選擇，例如呢碟新店限定嘅松露醬鮑魚帶子片扁意粉，松露醬分量唔多但足以帶起香味。帶子片煎至金黃色，口感爽滑彈牙。而鮑魚片都有鮮味。唯一係扁意粉略嫌腍咗少少，唔夠al dente。
 

三大扒餐推介

野菌牛柳餐（配牛油餐包、餐湯及餐飲 $128）

連扒餐都有新嘢！馳名牛柳同西冷牛扒可以選配新出嘅野菌汁，趁鐵板仲熱嘅時候將野菌汁淋上去，唔單止色香味，加埋滋滋聲，細細個鋸扒嘅回憶返哂嚟！野菌汁聞落幾香，食落就菇菌香味唔算霸道，唔會搶走牛柳味。牛柳口感軟腍而唔會過鬆，加埋下面嘅配菜同薯條，男士們應該都會夠飽肚。
 

美國紅酒燒牛小排餐（配牛油餐包、餐湯及餐飲 $148）

另一新口味係紅酒燒牛小排。平時唔飲酒嘅朋友都唔洗擔心，因為紅酒煮過之後只剩低香味同少少酸味，入口完全唔嗆喉，仲令牛小排食落更Juicy。不過比起牛柳，牛小排比較薄身，口感略為扣分。可以選配蒜蓉汁或黑椒汁。
 

美國安格斯肉眼扒餐（配牛油餐包、餐湯及餐飲 $152）（蒜蓉+$2）

想食牛味濃郁啲嘅，就要揀安格斯肉眼扒喇。油脂香加上半熟粉嫩嘅牛肉，係幾吸引嘅，唯一缺點係口感韌咗少少。如果係餐廳嘅忠實粉絲，嚟到一定會識得嗌加蒜蓉！生蒜蓉辣勁十足，但又惹味到令人忍唔住繼續食。同樣可以選配蒜蓉汁或黑椒汁。
 

懷舊飲品甜品

唂咕（凍）（$28）

九十後或者零零後真係未必知咩係唂咕，其實佢係一種可可粉。以前朱古力粉太貴，餐廳就會以價錢大眾化嘅唂咕粉代替，飲落有可可香味，但就無朱古力咁甜同咁滑。另外呢度仲有玻璃樽枝裝汽水，成個Feel真係好懷舊。
 

懷舊超級香蕉船（$88）

但如果要令各位大小朋友都「哇」一聲嘅話，就要點呢個超級香蕉船！雖然餐牌上寫2人份，但開飯仔就覺得4個人分嚟食都夠滿足！除咗有四球雪糕同圍邊嘅香蕉之外，仲有忌廉、餅乾、Pocky、水果、穀類早餐等配料，雪糕球下面仲有消化餅同棉花糖。
 

四球雪糕每次都會係唔同口味，好似開飯仔今次就有朱古力、雲呢嗱、芝麻同綠茶口味。當中以香味濃郁嘅芝麻最討喜。分量十足之餘其實亦落足心思，好似麥芽糖餅、手指餅、威化餅都係大家由細食到大嘅餅乾。最後紙遮裝飾完全係畫龍點睛！
 

最後溫馨提示一句，餐廳農曆新年初一至初三（2月16日至18日）休息，唔好一心諗住去鋸扒結果變咗食白果呀。

金鳳大餐廳
荔枝角長順街15號D2 Place二期3樓312號舖

文、相、片：Cathy