大部分人去台北嘅行程，不外乎都係食、食、食，同埋食，夜巿掃街就梗㗎啦，咁日頭呢？文青café？牛肉麵鹽酥雞蚵仔煎生煎包胡椒餅滷肉飯珍珠奶茶芋圓蔥抓餅刈包？Come on，畀啲新意，我哋去試舊嘢！我指古早味呀，即係老店呀。台北有唔少餐廳都開咗廿年以上㗎喇，有啲最近仲做緊優惠添：
百年老店 小春樓滷味
老店嚟講，呢間滷味店真係相當有歷史，開咗接近100年喇。第3代傳人葉小姐堅持用祖傳配方去調製滷味，要用上10幾種獨門香料㗎，連辣椒醬都係自製嘅，辣得嚟好香。
舖頭門面好光猛，同埋最緊要，乾淨！所有滷味都放喺透明嘅保溫櫃度，鴨舌、鴨掌、雞脾、雞、豬耳、鴨胗、鵝腸等等都有，全部都係即日新鮮做，趁新鮮梗係最好就即日食啦，如果唔係兩日內都好食埋佢喇。好多人去到通常都會有選擇困難，因為真係太多款揀。建議試下鴨舌同鴨胗，呢度嘅鴨舌係去咗喉管㗎，冇血腥味之餘又保留到彈性，鴨胗亦都好爽口。另外仲有真空包裝同送貨去到旅館嘅服務，又幾方便。
優惠：送滷味組合包一組 (價值NT$200)
超幼滑豆腐絲湯 銀翼餐廳
呢間有超過60年歷史嘅淮揚菜餐廳，交通都幾方便下，喺捷運東門站行3分鐘左右就到。淮陽菜注重刀功同火候，一睇呢碗文思豆腐湯就知道師傅嘅刀功有幾強。一條條白色嘅豆腐絲，幼得嚟又唔會碎，食落都好滑。而清炒鱔魚亦都係好滑，仲好彈牙，重點係冇魚腥味嘛。另一道名菜蔥開煨麵，滿滿der都係用高湯同雞湯製嘅湯汁，一食就食得到好重嘅蝦米味，係香口嘅，而麵質就偏腍身。圓滿嘅一餐梗係唔少得甜品，餅皮薄嘅薄豆沙鍋餅，即到即食嘅話，都幾脆口，豆沙餡多到外露晒！不過你又唔使驚佢咁多就會好甜喎，啱啱好。
優惠：送豆沙鍋餅一份 (價值NT$200)
半生熟池魚 京都鐵板燒
呢間係一間結合咗日式同法式嘅鐵板燒料理，開咗就嚟30年喇。餐廳主打新鮮嘅海鮮，喺廚房入面有幾個魚缸，有龍蝦呀、鮑魚呀咁，係加拿大波士頓龍蝦，同南非鮑魚嚟呀，所以餐廳亦都主推龍蝦、鮑魚套餐。而明蝦套餐啲蝦肉新鮮彈牙；池魚由大廚輕輕喺鐵板度炒兩炒就上碟，所以肉身仲係生嘅，但係魚皮呢就脆卜卜嘅，一條魚兩種質感。加少少錢就有得食嘅美國沙朗牛扒，肉質嫩滑。另外要講下嘅係啲醬，同平時食開嘅都幾唔同，呢度每人3款：橘橙醬、生洋蔥、芥末醬，fresh得嚟都幾夾。一分錢一分貨，咁新鮮嘅海鮮價錢當然都有返咁上下。
優惠：餐點有9折優惠
辣魔至愛 KIKI餐廳 (延吉創始店)
有冇好鍾意食辣，仲要係川辣嘅朋友？呢間食川菜為主嘅餐廳就啱晒嘞，餐牌上大部分嘅菜式都有辣椒仔喺隔離，由一隻到四隻都有，聽聞全間舖最辣嘅就係川味麻辣鍋、牛角椒塞肉（秋冬限定）同埋麻婆豆腐。而喺最受歡迎菜式排行榜上嘅頭兩名，就係老皮嫩肉同蒼蠅頭，前者即係香港人叫嘅炸玉子豆腐，浸住少少辣油，夠香口。後者就係將切到差唔多大細嘅韭菜花、肉碎同豆豉，加埋辣椒一齊炒香，鹹鹹地好啱送飯。初初食嗰陣唔係好覺辣嘅，但唔好睇少佢，食多幾啖，啲辣味就會慢慢咁喺喉嚨滲返出嚟㗎喇。講多個公開嘅小秘密你知，呢間餐廳係舒淇有份開㗎。
優惠：送老皮嫩肉一份 (價值NT$220)
地道家常小炒 古都食堂
去到台灣，當然都會想食返地道嘅台灣菜啦。呢間餐廳食嘅都係台灣人嘅家常小炒介紹返，首推一定係豆干炒脆瓜，又係一道好啱送飯嘅菜式，豆干唔乾而脆瓜好脆。話說豆干同脆瓜原本係分開兩道菜嚟，後嚟有客人建議二合為一，就成為咗今日嘅招牌菜喇。秋、冬天去嘅話建議可點刈菜雞，成煲連爐咁上㗎，有菜有雞有湯，一路滾住一路食。刈菜即係我哋叫開嘅芥菜，成煲湯清甜得嚟帶少少甘，雞肉都幾鮮嫩，不過人多先好嗌呀，都幾大煲㗎。
優惠：送香腸紅燒肉拼盤一份 (價值NT$200)
最後提提你，只要買指定華航嘅套裝行程，就可以免費得到優惠券，享用以上優惠喇。另外仲有好多其他老店，喺年底前去食都一樣有優惠呀！
BTW,開飯仔今次去台灣入住咗捷絲旅臺大尊賢館，非常之有驚喜，房間相當闊落，佈置簡單得來又有風格，最正係張床，兩個人都未必瞓得晒，真心舒服唔錯，佢哋喺台北有三間分店，大家下次可以考慮一下。
