大埔新開功夫火鍋店名廚監製養顏湯底創新混丸手切肥牛（有片）

呢排keep住都係凍冰冰，日日都想打邊爐，烚下烚下暖啲嘛。咁啱，大埔就新開咗間功夫火鍋店，啲食材全部都好花功夫預備，湯底又滋潤喎，而且仲係由中菜名廚陳國強監製嘅。

打邊爐嘅精髓在於湯底，貪靚女生必點「黃湯鴛鴦花膠雞鍋」啦，用三黃雞、老雞、金華火腿、花膠、魚肚煲足一日㗎，又足料又鮮甜，建議一嚟咩都唔好落，淨係飲咗啲湯同食咗啲配料，先至再加湯落打邊爐嘅料。

另外貴陽酸菜海斑鍋就有一件件龍躉，爽口彈牙，湯底層次幾豐富，唔同嘅味道慢慢滲出嚟，先酸後辣仲有啲薄荷涼涼地嘅feel，幾開胃，記得都係先飲湯後淥料呀。

至於火鍋料方面，當然都係以海鮮、肥牛、丸類做主打。餐廳特設「肥牛吧」同「丸吧」，由年輕嘅翔師傅即席切肉同手打丸。「肥牛吧」會掛晒啲肉出嚟，鍾意邊嚿就可以點邊嚿，選擇包括有日本A4和牛、比和牛更溶嘅日本三角腩、冰鮮安格斯同本地牛肉。牛魔王可以考慮要個牛肉盛，一盤份量都幾多下。

而「丸吧」呢就有每日新鮮手打嘅鮮蝦膠、墨魚膠、潮州魚丸、青葱鯪魚肉、陳皮牛丸、孜然羊肉丸、豬肉丸、雞肉丸，食得出真材實料！貪心仔仲可以玩Mix and Match，整粒混丸出嚟都冇問題，即係羊肉丸溝蝦膠咁都得，今次真係可以溝埋一齊嚟做瀨尿牛丸喇科科。同時，手打丸入面再包餡，好似海膽醬、白松露醬、芝士或鵝肝醬咁都ok，玩味十足。