年青人嘅力量係唔可以睇少，大人們好多時都未必有佢哋咁精明咁知窿路，尤其大學宿舍附近其實有唔少食好西嘅地方。今次開飯仔決定帶大家食晒全香港嘅大學生食堂，第一站就嚟到九龍城，由於呢到鄰近幾間九龍區嘅大學，當然係收埋唔少平民美食喇，睇下啲後生有咩推介畀我呢啲老友記（扮老Mode啟動）。

男人嘅浪漫　成發潮州菜館

 　　　　　　　　　　　　　（圖：Lawrence Lau）

好多人一諗起九龍城就以為一定係食泰國嘢，其實呢到仲有其他好嘢食，潮州打冷就係一個唔錯嘅選擇。唔少大學生都鍾意喺附近打完波成班男人過嚟食晚飯順便啤啤佢，因為呢到真係CP值好高。食得打冷點可以唔叫返碗韭菜豬紅，另外用酸梅做配料嘅潮香骨亦可以一試，味道酸酸地令人胃口大增，再飲啖啤酒，簡直係男人嘅浪漫。

 （圖：mandymanlovefoodie、JENNYnewlife）

你知啦，住得大學宿舍好多時都夜訓，十一二點先嚟肚餓，梗係要落九龍城食返個宵夜填下肚。呢間有口福車仔麵就係其中一間宵夜之選，有超多款餸任你揀，蘿蔔、豬皮入味，咖喱魚蛋汁惹味，土魷爽口，價錢公道，啱晒宵夜開餐，難怪時不時都有大學生夜媽媽嚟食啦。

 （圖：mohkc）

講到泰國菜，九龍城的確係有數之不盡咁多個選擇，但係要數出大學生最愛去嘅泰國菜館，一定非呢兩間莫屬。單睇裝修同環境，你未必會揀呢間興隆泰國美食，但試過你就明白點解晚晚都會有人排隊等位！招牌菜豬肉碎生菜包，只有少量肥肉，辣度適中；串燒蘸上秘製嘅花生沙茶醬，的確會令人食上癮。餐廳環境就係簡陋咗啲，但美食搭夠，已經值得令人回頭！

泰禾美係最受附近住嘅大學生歡迎嘅泰菜，抵食之餘亦有質素，包你可以喺到食到肚滿腸肥。青木瓜沙律用清甜木瓜絲配上酸辣配菜，超開胃；烤魚大大條，擺上枱晒夠霸氣。仲有呢到嘅燒雞翼燒得恰到好處、菠蘿炒飯亦有唔少食客推薦，所有食物由泰國人親自主理，唔怪得味道咁正宗喇。近排泰禾美仲搬咗新舖，比起舊舖啲位闊落咗，環境舒服咗，今次又多個藉口返去再幫襯啦！ 

 （圖：BoboBin、MaryMuahx）

做得大學生又點少得玩通頂，當然要玩完成晚朝早再飲埋早茶先叫熱血！點心居營業時間由朝早六點至凌晨兩點半，無論早餐團定宵夜團都無任歡迎。呢到嘅流沙包差唔多係每抬必叫，一咬開個包熱騰騰嘅蛋黃流沙全部湧晒出嚟，記住要小心燙口。蜜味叉燒腸粉皮薄，而且分分鐘仲滑過你塊面，配上甜豉油，又係另一樣必叫點心。仲有好多傳統點心，款款都用真材實料，價錢公道，茶位只係位位三蚊，所以不論係老人家定學生都咁鍾意過嚟飲啖茶、食個包！

 （圖：dercch、Foodcaptain.hk）

九龍城一向多甜品舖，有時食厭咗中式傳統甜品都會想試下啲新嘢。嚐樂嘅裝修相當有心思，放滿咗唔少模型擺設同名信片，令人有一種親切感。呢度有多款創新甜品，其他地方肯定未見過，而且款款個樣都好靚，真係令人有衝動試晒咁多款。當中黑糖奶茶皇奶茶味濃，星星茶莊嘅綠茶果凍甜度適中，唔會太甜膩，做飯後甜品最適合。不過店內面積唔大，只有五張枱，可能要等多陣，多人可以叫外賣返宿舍食。


文：Dap


其他精選文章推介：
【新店直擊】100%日本原產人氣蛋糕店登陸太古 Tea Time生日蛋糕有著落（有片）
【熟食中心尋寶】點心奶茶瓣瓣掂 上環市政大廈
【雞年開飯】「糕」賀雞年！農曆新年新年糕