飲酒無需搵原因，想飲咪飲囉。但如果真係要搵原因，大角咀有居酒屋新推出兩小時啤酒、日本酒放題任飲，難得可以一次過任試超過成廿款酒，呢個原因夠唔夠強？

呢間居酒屋推出嘅「啤酒‧日本酒放題」，總共有三個放題級別選擇，分別係梅($278/ 位)、竹($308/ 位)、松($338/ 位)，每款放題都包送3款關東煮、1份先付同4串串燒！

最低級別嘅「梅」就啱晒鍾意飲酒但又唔飲得太多太濃烈酒嘅朋友，特別係女生，因為呢級可以飲嘅，主要都係較為甜身啲嘅果酒或者梅酒。

粉紅色嘅Strawberry & Lime果酒，4.5%酒精，非常爽口，而且清甜嘅士多啤梨味突出。人氣果酒舩坂熟成梅子酒味道都幾甜，而舩坂柚子兵衛則帶有清新嘅柚香， 酸酸咪咪咁好易入口。

「竹」就喺「梅」嘅基本酒款以上，再加多咗7款日本清酒同吟釀。當中特別推介雪之茅舍山廢本釀造，呢隻酒酒體濃醇，米味香甜，如果溫熱飲仲有淡淡果香；賀茂鶴酒造一滴入魂純米吟釀嘅米香同樣豐富，而且呢隻仲有啲微辛嘅感覺，餘韻悠長，襯串燒食幾夾。

至於自問係酒鬼嘅朋友，就當然要揀最高級嘅「松 」啦，除咗可以揀「竹」、「梅」嘅酒之外，仲有啲舖頭新引入嘅清酒，其中一隻就係帶有哈密瓜果香嘅自言自語純米吟釀。而且4個人嗌嘅話，成枱仲會額外送多支「獺祭三割九純米大吟釀」或者「梵特撰純米大吟釀」添呀！

至於附送嘅先付，食得辣嘅話韓醬青瓜係必然首選，佐酒一流。

串燒選擇多多，淨係雞肉都可以揀要大蔥雞肉、梅子紫蘇雞肉、胡椒柚子雞肉、山葵雞肉定明太子雞肉串，另外仲有 明太子玉子燒、煙肉露筍卷等，即叫即燒，相當香口惹味。

而餐廳本身就係主打關東煮，湯底烹煮5個鐘以上，原汁原味，唔同食材仲有唔同醬料配搭。

東京大眾酒場 
地址：大角咀利得街11號利奧坊地下G504號舖

文、相、片：Kar