天水圍T Market 頌富市場日前全新開幕，當中小食街大部分商店更加營業至凌晨一點，最啱各位街坊嚟掃街買宵夜！選擇由麻辣燙、足料糖水、即整小食，到台式飲品都應有盡有。
 

冒菜麻辣燙　任夾任加冒菜

四川冒菜（$6-12/款，$55/6款，$75/10款）

四川冒菜類似麻辣燙，但比一般麻辣燙少油。配料選擇多元化，湯底就有麻辣同番茄湯底兩款，即夾即煮。比較特別嘅配料有重慶直送貢菜同油面根，前者煮之前睇落好似普通菜乾，煮過後變得爽脆帶靭；後者會吸曬湯底精華，而且無油膩感。
 

另外一個特別之處係有多款配料任加，自問重口味嘅就唔洗諗全部加曬啦！有蔥、芫荽、花生、醋等等。當中炸醬同榨菜都非常香口，可以落多啲；辣油辣度頗高，怕辣人士就唔好加太多啦。
 

椰子媽　創意足料糖水

楊枝甘露（$28）

呢間就主打中式糖水同創意港式甜品，而且係真材實料，好似呢碗楊枝甘露唔單止糖水底有加芒果肉去打，每碗仲有近三分之一個芒果果肉，配埋西米同柚子肉甜而不膩。
 

復仇滾木（淮山椰奶香芋西米露）（$26）

呢度嘅糖水名都相當得意，配搭亦別出心裁。椰子西米露加芋頭就無咩特別，呢度就特別加入淮山，口感同味道都幾夾。
 

炸雪糕（$12）

香口小食，炸至外面金黃香脆，裡面嘅雲呢拿雪糕就半融。一熱一動凍一脆一滑層次明顯。
 

 
頌富美食　街坊最愛小食

章魚小丸子（$16/6粒）

喺頌富市場營業近30年，有唔少學生同街坊熟客，最受歡迎嘅小食係現場即整嘅章魚小丸子，粒粒都有章魚肉，配上照燒醬、沙律醬同紫菜，惹味又夠飽肚。
 

雪國Q餅（$20/3款配料）

圓形Q餅即叫即煎，類似港式crêpe，可以夾唔同配料，例如鹹嘅芝士、火腿、肉鬆、吞拿魚等，亦有甜嘅例如雜果同朱古力。餅皮邊位偏脆而中心偏軟，同唔同味道嘅配料都夾到。
 

壹茶　首創蛋糕奶茶

草莓蛋糕奶茶（$26）

成日掃街嘅朋友可能都會飲過，奶茶底選用四款原葉紅茶混搭沖成，蛋糕醬就用北海道 3.6 牛奶、淡奶油等以店家秘方調製，比一般奶茶更滑溜香濃，加酸酸甜甜嘅·士多啤梨醬可以中和膩度。
 

大麥紫薯奶茶（$31）

近年大熱嘅紫薯呢度一樣有，近半杯紫薯蓉一睇就知夠足料，甜度適中味道自然。
 

燒賣王子　即包手工燒賣

麻辣燒賣（$15/5粒）

進駐過唔少街市小食街嘅燒賣王子繼續推出新口味：麻辣糯米燒賣！糯米燒賣Q糯有咬口，麻辣醬嘅辣味無想像中咁勁，少少麻少少辣幾惹味。無辣不歡嘅朋友就記得加佢地嘅咖哩醬啦。
 

皇后餃子　人氣新品登場

狗仔粉（$25）

呢間主打自家餃子嘅小食店亦有推出新品，好似暖笠笠嘅生炒糯米飯，同最啱宵夜食嘅狗仔粉！上面惹味爽脆嘅菜脯係亮點，湯底濃郁而唔過鹹，不過麵就略嫌太腍。

T Market
地址：天水圍天華路33號T Town North地下T Town頌富市場

文、相、片：Cathy