中西日韓菜食得多，偶然都要發掘下新口味嘅係咪？中環呢度就有間由土生土長嘅秘魯大廚開設嘅小店，主打秘魯國民級美食烤雞，同當地嘅一系列街頭小食！唔少食材都從秘魯運到香港，沿用當地傳統配方再加以改良，啱哂香港人口味。
 

Chullschick創辦人Abel嚟咗香港四年，呢間餐廳就係佢同太太嘅心血結晶。Abel爸爸係秘魯水軍廚師，Abel自己亦喺秘魯有長達12年嘅餐飲經驗。今次開店唔少細節都相當考究，好似特別從秘魯買烤雞爐同保溫盒，前者特點係可以令烤雞360°均勻受熱，後者幫烤雞Keep住溫度。
 

招牌秘魯烤雞（半隻配兩款配菜 $138）

選用約1.2kg肉質嫩滑嘅法國雞，參考秘魯經典烤雞店嘅傳統方法：用黑啤同薑、迷迭香等多款香料醃製兩日，烤一個鐘之後變成風味十足嘅秘魯烤雞！秘魯人比較重口味，所以Abel特別調製過食譜，保證大家食到香料味道但又唔會過鹹。烤雞皮相當薄而香口，雞肉亦柔軟多汁。
 

配菜都相當有特色！每日都會有唔同選擇，好似開飯仔採訪當日就有兩款沙律、薯條、烤番薯同蒜蓉飯。開飯仔就揀咗Caigua沙律同烤番薯，Caigua係秘魯一款特色瓜類，形似青椒而口感清脆，用嚟做沙律感覺清新。而烤番薯亦非常香甜。
 

煙燻豬肉三文治（$78）

麵包係自家製Chulls Bread，煙燻豬腩肉亦先慢煮13小時，再以秘魯購入嘅煙燻爐燻製一個鐘。麵包脆口而豬腩肉香而不膩。不過開飯仔覺得最搶鏡嘅其實係秘魯莎莎醬同洋蔥等配料！濃郁香料味道加上洋蔥嘅辛辣，夠哂惹味。
 

秘魯生漬魚（$78）

想試比較少見嘅秘魯口味？可以嚟試呢碟生漬魚！用海鱸魚配秘魯粟米、洋蔥同一款叫Tiger’s Milk嘅醬汁，用青檸、辣椒、薑、洋蔥同海鱸魚汁混合而成。酸味突出帶微辣，初初食可能會有啲唔慣，習慣咗其實又覺得幾開胃。聽聞唔少居港秘魯人仲鍾意要多啲Tiger’s Milk當飲品咁飲，仲話可以解酒，信不信就由你喇。
 

 

秘魯辣椒蜜糖雞翼（$78/6件）

相反呢碟雞翼就相當易入口，皮脆肉滑嘅雞翼加上用秘魯安第斯山脈嘅紅辣椒同蜜糖、脆蒜、芝麻整嘅醬汁，甜辣開胃又香脆，係唔錯嘅送酒小食。
 

秘魯特色香腸薯條（$78/6件）

另一香口前菜之選，係源自秘魯首都利馬嘅街頭小食香腸薯條，喺當地受歡迎程度有如香港嘅咖喱魚蛋。香腸同薯條相信大家都唔會覺得陌生，呢度配以香口嘅黑松露蛋黃醬同酸甜茄汁，令香腸薯條變得更惹味更令人忍唔到口！
 

自家製雪糕三文治（$48）

最後唔少得甜品，朱古力曲奇同牛油果雪糕都係自家製，前者富朱古力香而唔過甜，後者有粒粒牛油果肉。不過夾埋一齊就略嫌朱古力香蓋過牛油果嘅味道，有啲可惜咁囉。提提大家雖然雪糕唔算融得快，但最好都係快啲食，如果唔係曲奇變腍就扣分啦。
 

秘魯Churros（未定價）

餐廳想推廣傳統秘魯菜同街頭小食，所以Menu會不定期更換，佢地計劃緊嚟緊想推出嘅新甜品包括呢款秘魯Churros。同西班牙秘魯Churros有少少唔同，佢地係將焦糖醬放喺Churros入面，炸熟再撒上砂糖，甜香滿分。
 

秘魯特色食材

香港其實都有好幾間秘魯餐廳，但當中以Fusion菜為主，主打傳統秘魯菜嘅暫時就得呢間。所以亦係全港唯一一間得到秘魯駐香港出口暨觀光局官方認可的餐廳！ 無論你係對秘魯定秘魯菜有興趣，呢度都唔會令你失望。
 

Chullschick
地址：中環蘇豪嘉咸街45-53號地下D舖

文：Cathy
相、片：Tom Li