呢間韓燒店多年前已經喺旺角開店，一向以性價比高著稱，餐廳主打韓燒任飲任食，包括燒肉、海鮮及韓式小食等～最近餐廳正式於將軍澳開分店，裝潢好有韓式風味，座位闊落，新分店首推自助吧，而且而家仲有新張優惠，7點前離座晚市最平$178就可以任食110分鐘，真係好抵！
食物方面，最回本當然係任食海鮮喇，海鮮選擇有蒜蓉芝士生蠔、生蠔、扇貝、帶子、藍青口及大蝦等，雖然選擇唔算好多，但任食嚟講海鮮質素都唔錯，食多兩round都無問題。
講到燒肉，牛當然係必食喇！呢道牛嘅選擇都好多，包括烤肥牛、一口牛脷粒、雪花牛仔肉、牛肋骨、牛柳片、牛柳粒及牛五花等，仲有推介嘅西施牛肉片及薄切西冷牛扒，前者鬆化而有嚼勁，後者牛味都幾出。
豬肉就唔少得韓燒必食嘅五花腩，選用黑豚肉，肥瘦兼備，肉質爽口肉味濃，燒至微焦口感更香脆。豬頭枕即係豬頸脊肉，口感爽脆！另外仲有供應羊西冷及羊髀肉畀鍾意羊肉嘅朋友。
除咗燒肉餐廳仲有供應韓式小食，好似多款口味嘅韓式炸雞，有原味、清新嘅柚子及辣味，仲有一款噴火辣畀大家挑戰！炸餃子、炸魷魚、韓式水冷麵及年糕湯通通有得食～
新分店首推自助吧，客人可隨意揀選小食、熟食、甜品及飲品。
地址: 將軍澳唐賢街9號Popcorn商場2樓PopFood 4號舖
文、相、片: Yanica