曾經同馬鞍山齊名，被網民稱為「美食沙漠」嘅將軍澳，隨住海濱長廊沿海位置愈開愈多餐廳，已經擺脫咗呢個稱號喇。今次要介紹嘅呢間法式餐館，以紅、藍為主色調，既有室內座位，亦有露天座位可以嘆住海景咁食法國菜。

  雙重芝士焗梳乎厘

芝士控不能錯過呢度嘅雙重芝士焗梳乎厘，以羊奶同Gruyère芝士焗製而成，口感鬆軟，啖啖都係芝士鹹香濃郁嘅味道。不過雖然有啲芝麻菜同香梨沙律墊底中和一下，但如果自己食晒一個都有少少膩，share就好啲。

 牛腹肉牛扒

牛扒選擇有幾款，包括和牛腹肉、牛腹肉牛扒、西冷牛扒同牛柳，主要係嚟自澳洲牧場。例如牛腹肉牛扒就係選自黑安格斯牛牧場——Rangers Valley——專營美國頂級安格斯黑牛同和牛雜交繁殖，以穀物飼養。牛扒厚切，油花細緻均勻，肉味香濃。

 自家燉煮牛面頰寬帶麵

面層舖滿巴馬臣芝士嘅自家燉煮牛面頰寬帶麵，牛面頰肉肉質細嫩軟腍，麵條煙韌。

 白酒燴青口

要特別介紹下呢度嘅甜品同雪糕，全部都係自家製作，出面仲有個雪糕同糕點專櫃，大家order之前，都可以出去望下揀下先。

 雲呢嗱八角、紅桑子奶茶雪糕

自家製雪糕以澳洲牛奶製作，口味獨特，例如有雲呢嗱八角、紅桑子奶茶、鹹甜海鹽焦糖花生等。紅桑子奶茶嘅茶味甚香呢。

 清新檸檬撻

甜品方面，每日都有唔同精選款式。特別推介清新檸檬撻，如果食到有少少飽食呢個就最啱，酸味突出，面頭有軟滑香甜嘅棉花糖，酸甜層次分明，立馬有解膩嘅感覺。

 巴斯克芝士蛋糕、忌廉泡芙

大熱嘅巴斯克芝士蛋糕做得唔錯，焦香味重，口感軟滑；忌廉泡芙亦夠鬆軟。

 香濃朱古力撻

香濃朱古力撻望落係幾吸引，不過必須要提醒大家，呢個甜度極，略有膩感，如果真係想食呢個嘅，記得要留肚。

呢度成個環境都咁Chill，點少得cocktails吖？多款cocktails都揉合現代巴黎元素，好似招牌之一嘅beef it咁，結合咗和牛油脂嘅波本威士忌同煙燻威士忌、重有經燒製嘅蜂蜜糖漿同苦酒，最後放多塊自家製和牛肉乾落去，飲落唔太辛而又有啲smoky。

District 8
地址：將軍澳唐賢街29號藍塘傲格林威治村地下10號舖

文、相、片：Kar