香港壽司舖好多，但冇乜幾多間係好似日本傳統文化——立食。最近尖咀就開咗間，專做壽司同丼飯嘅小店。餐廳雖然係立食，講求速度，但一樣講求質素呀。食材好新鮮，全部每日由築地直接運送。

最吸引嘅一定係「海膽特盛」！唔好睇佢好似細細碗咁，啲飯都砌到一座小山丘咁，面頭啲海膽有三大板，用嘅係韓國馬糞膽，新鮮呀。啲飯都要介紹下，較平時見到嘅壽司飯深色，原來係用咗赤醋嘅關係。呢隻醋本身加咗啲酒去釀，所以都幾香醇。

另一樣又係多到滿瀉嘅，三文魚子壽司。啲三文魚子好鮮甜，一啲都唔腥，而原來師傅仲多咗啲手腳架……喺面層加咗啲柚子皮粒，微微嘅酸味更能帶出佢嘅鮮味。

火炙海膽蟹棒壽司同金目鯛壽司都好受食客歡迎，壽司飯嘅係一口嘅size，金目鯛好爽脆。

唔想逐件逐件揀嘅，可以揀預設咗嘅壽司拼盤，有全set都係三文魚組合嘅，亦有全set都係吞拿魚嘅。今次介紹呢set呢就係「特上壽司拼盤」，一set五件包括牡丹蝦、深海池魚、北海道帶子、中吞拿魚腩同海膽。蝦肉爽口，深海池魚油份夠多，味道清甜。Lunch仲會免費送埋沙律同湯。

舖頭細細間，大約得12-14個企位。個個企喺度食，好有日本嘅感覺。

立鮨
地址：尖沙咀金馬倫道23D號地舖

文、相：Kar