早前同大家介紹咗一系列嘅果系下午茶，一眾生果迷就好開心，但綠茶控都唔使扁咀嘅，今日就同你哋講個好消息。尖沙咀有間酒店裝修完重開，第一炮就係推出綠茶下午茶喇！仲有tea set同自助餐揀，夠晒free。

先講tea set，「綠茶蜜語下午茶」，顧名思義當然有好多款綠茶小食同甜品。冷盤有綠茶帶子蟹肉雜果沙律、芝士龍蝦綠茶冷麵。小食都幾新奇，綠茶炸芝士雞扒、磯燒鮑魚菠蘿沙沙酥盒，我估應該冇乜人食過。流心雞扒嗰款，平時食流心雞扒都已經好開心，今次中間流心位仲要有埋特調嘅綠茶芝士醬。

而大家最關注嘅甜品，就有綠茶豆腐慕絲蛋糕、綠茶歌劇院蛋糕、紅豆綠茶奶凍、綠茶意大利芝士蛋糕、士多啤梨綠茶朱古力撻，總之就樣樣嘢都有綠茶啦。想再開心啲嘅，加多三十零蚊就可以食埋MOVENPICK雪糕伴綠茶朱古力心太軟或者綠茶紅豆窩夫。

至於「仲夏綠茶派對」，就係下午茶自助餐嚟。上面tea set食到嘅，buffet通通都有得食。另外仲會額外提供綠茶藜麥果凍沙律、綠茶豆腐蜆煲、綠茶海鮮芝士酥盒、綠茶朱古力雞蛋仔等等。

Park Cafe
重新開店日期：8月2日

文：Kar