尖沙咀呢間酒店嘅下午茶一向都有質素保證，嚟緊7月，佢哋又有新款嘅tea set，用Haagen Dazs早前新出嘅朱古力做主打製作，而且，仲有得無限任食Haagen Dazs嘅雪糕添呀！喂，我隔住個mon都見到好多對眼都變咗心心眼喇……

呢個tea set有別於以往嘅三層架，改以一個夏日花園咁嘅形式出場，係另一種氣派嚟。都係一個字：靚！總共6款鹹點5款甜點再加英式鬆餅（原味及朱古力味）。

先介紹大家最關注嘅甜點，紅桑莓棉花糖食落雖然完全唔係棉花糖嘅口感，但係味道唔錯，師傅將紅桑莓同黑朱古力煮成軟綿嘅朱古力慕絲，再蘸上杏仁粒同黑朱古力醬，酸甜之中帶有淡淡果香，同粒粒口感。另外嘅榛子朱古力同清香檸檬撻造型同樣精緻，整到好似成支棒棒糖咁。前者用黑朱古力製成幼滑嘅朱古力忌廉，再配埋烤製過嘅榛子同花形曲奇餅；後者嘅酸酸甜甜咁，相當清新。

Haagen Dazs主題點可以冇雪糕呢？全新口味白桃紅桑子雪糕、黃桃乳酪雪糕外層輕輕加咗薄薄der朱古力殼，細心食仲有機會食到果肉添~ 細細聲話你哋聽，每日仲有6款唔同口味嘅雪糕無限量供應，之係任食呀！！

都仲唔夠喉嘅話，可以加少少錢要個Ice-Cream Planet，好鬼靚㗎，雪糕啦、新鮮生果啦、朱古力啦同時包晒喺一杯入面，每星期出兩款味，包括有白桃紅桑子、黃桃乳酪、抹茶、呍呢嗱、桑果雪菓、藍莓。

至於鹹點方面，就係餐廳一向嘅招牌點心：無花果伴火腿、鴨肝多士、煙三文魚撻、西班牙彩椒辣肉腸串等，仲有杯香濃蘑菇湯！

 英式鬆餅（原味及朱古力味）

Green
地址：尖沙咀科學館道17號唯港薈地下
期間限定：7月9日 - 9月2日

文、相：Kar