尼泊爾餃子同中式傳統餃子有咩分別？尖沙咀同中環最近同步新開咗一間新派嘅手工尼泊爾餃子店，啲餃子全部都五顏六色，又紅又綠色仲有橙白色添~ 餡料亦創新，有海南雞味、日式咖喱吉列雞味等。原來只係一對喺香港土生土長嘅尼泊爾兄弟創作嘅，將家鄉傳統文化混合各國特色，帶嚟新意。

餐廳主打自家製傳統及創意尼泊爾餃子（momos）同卷物（rolls），鮮豔嘅餃子麵皮，顏色取自天然素材，例如紅色嘅係加入咗紅菜頭汁，綠色嗰款就用咗菠菜汁。唔止麵皮係自家製，就連餡料，以至到醬汁都係呢。尼泊爾餃子較我哋一般食開嘅餃子厚皮，而且多咗重香料味道。

 火辣羊肉momo

一籠八隻嘅厚皮餃子，最推介嘅係火辣羊肉momo，選用嚟自紐西蘭嘅羊肉，混入洋蔥、蒜頭、尼泊爾辣椒、小茴香、檸檬等，味道算係最濃郁嘅一款，羊肉香得嚟又唔會太羶。

 海南雞momo 

 韓國泡菜momo

比較特別嘅有海南雞momo同韓國泡菜momo，前者包住以自家熬製湯汁烹調過嘅海南雞同飯粒，不過就咁食就相對淡口咗少少，點埋薑蓉就會好啲；而後者則有韓國泡菜、韓國粉絲、哈羅米芝士等做餡，微微辣啦。

 日式咖喱吉列雞momo

日式咖喱吉列雞momo都幾有趣，炸過嘅momo外層係幾脆，不過略嫌都係厚身咗少少，有啲硬。呢款momo點咖喱汁就最夾，啖啖濃香。

 醬汁炸蝦尼泊爾蛋卷

除咗momo，蛋卷亦係尼泊爾菜中嘅主角，傳統就通常捲雞肉或者羊肉再加香料嘅，而餐廳就繼續發揮創意，注入各國料理元素。例如有靈感嚟自美國Dynamite Prawn嘅醬汁炸蝦尼泊爾蛋卷。蝦肉皮脆肉甜，配合自家製嘅醬汁同蛋黃醬沙律、雞蛋等捲起，味道微辣鮮甜帶蛋香，比起momo更值一試呢~

 另有自家調配同入罐嘅冰涼飲料

Momoz
地址: 尖沙咀赫德道1-3號地舖

文、相、片：Kar