香港人近年開始注重健康，帶起一陣素食潮！尖沙咀啱啱就新開一間坊間較少見嘅新派韓式素食料理，選用天然植物性食材，更特別嘅係於素食中加入韓國寺廟飲食文化，餐廳希望將一個新嘅素食概念帶到香港，令食客有不一樣的素食體驗。

何謂寺廟菜式？餐廳總經理Kelvin Chung話寺廟菜式簡單嚟講係僧人食嘅食物，當中包含一啲學問，例如採摘的食物、處理手法及禮儀都有唔同。而餐廳菜式由韓籍行政總廚具辰光先生主理，佢於專門教授寺廟料理嘅廚藝學校學藝超過五六年，所以對於寺廟素食知識好豐富。至於調味料方面，韓國菜常用嘅醬料如大醬、豉油及辣椒醬等都由韓國運到，豉油更於韓國嘅山上釀製超過十年，加上具辰光配方，素食菜式同坊間所見嘅與眾不同。

韓籍行政總廚具辰光先生，師承韓國當地一位頂尖佛學法師，曾於寺廟內跟隨法師學藝長達六年，有別樹一格嘅烹調風格。

甜辣酥炸菇菌($238)

招牌菜甜辣酥炸菇菌，用咗唔同菇菌類酥炸而成，加上韓國辣醬及甜醬，香脆醒胃。

韓式粉絲雜菜腐皮福袋($188)

福袋比較厚身，會吸收更多湯汁質地亦更軟滑，而且腐皮福袋有先飛水後炆，減少油份更健康。餡料加入粉絲、冬菇及芫荽等，夠晒飽滿。

牛蒡絲煎釀豆腐配杏鮑菇($228)

將牛蒡絲切碎後釀入豆腐煎香，加入釀製十年嘅豉油混和成醬汁，味道濃郁。　

韓式綠豆煎餅($148)

綠豆煎餅係韓國街頭小食，平時韓國傳統製法多數以綠豆磨成粉，再加入肉類及海鮮等材料半煎炸至香脆，不過餐廳就會用蔬菜類取替，咁就健康好多。

只限晚市供應:

韓國人蔘沙律($198)

好多人對人蔘嘅印象都係偏苦同濃味，主要係因為多數見到嘅都係曬乾咗嘅人蔘，餐廳選用新鮮人蔘做沙律，味道會帶甘唔會太濃，配上酸酸地嘅醬汁就好夾。　

紫蘇葉籽芋頭湯($148)

呢道湯香港真係比較少見，紫蘇葉嘅味道未必個個接受到，餐廳用菜或菇做湯底，紫蘇葉味唔會太突出。

韓國蘿蔔包餃子($138)

蘿蔔包餃子係一道手工菜！選用韓國特別肥大嘅蘿蔔，將蘿蔔切成薄片後浸軟先做出餃子皮，餡料通常都係大醬配雜菜或菇類，鮮甜蘿蔔同濃味嘅大醬係最好嘅配搭。

紅棗玉桂糖水煮香梨($198)

用韓國香梨，香甜得嚟比較清爽，而且加入亞洲色彩，用紅棗及杞子等食材製作。

韓國純素定食($178)(只限午市)

土生花

地址: 尖沙咀梳士巴利道18號Victoria Dockside K11 Musea7樓704號舖

文: Yanica

相、片: Tom Li