去海景餐廳食飯，感覺特別寫意，好似尖沙咀海運大廈最近新開嘅粵菜食府，就坐擁180度維港海景喇。餐廳以「舊菜新造、中菜日化」為理念，同時亦係花膠專門店，大家可以喺美景相伴下，品嚐融入創新意念嘅經典粵菜同矜貴菜餚，即睇有咩必食款式啦～

經典粵菜

一蟹兩藝：皇室焗釀蟹蓋及炸軟殼蟹伴陳醋野菜沙律（$168/1人份）

師傅今次設計一味兩食嘅焗釀蟹蓋，特別選用原隻軟殼蟹，讓大家連蟹蓋都可以食埋。蟹蓋釀入滿滿嘅新鮮越南蟹蟹肉、車打芝士、洋蔥等材料，鹹度適中，外脆內軟。另外蟹身炸起後，配酸中帶甜嘅自家製陳醋汁同沙律菜，以減輕油膩感。

花膠蝦子柚皮（$388）

嚟到花膠專門店，當然要試下花膠啦。呢道經典粵菜花膠蝦子柚皮，選用較厚身嘅北非花膠扒，浸發後再雪藏鎖住膠質；而配搭嘅台灣文旦柚皮，經過過百次換水除去澀味，令你試到其清新嘅果香。兩樣食材最後放入魚湯炆煮5個鐘，呈現「腍、透、化」嘅效果；上菜前淋上用金華火腿、赤肉特食材熬5個鐘嘅上湯、灑上特級蝦籽，令鮮味更突出。

金勾魚湯文昌雞（$258/半隻）

鍾意飲湯嘅朋友，呢款滋陰養顏嘅金勾魚湯文昌雞就啱你喇。每煲魚湯用上2斤雞骨同新鮮艇魚，慢火熬煮超過3個鐘，直至湯頭變成奶白色，冇額外添加調味料，味道都濃郁而清潤；然後用湯渣翻煮另一煲湯，用嚟浸熟每日新鮮到港嘅海南文昌雞。雞肉嫩滑鮮味，面頭仲鋪上大隻嘅蝦乾作點綴，色香味俱全。

無花果蜜絲咕嚕豚肉（$168）

肥瘦均勻嘅本地豬梅肉，肉質鬆軟，好啱用嚟做咕嚕肉。表面沾上薄薄嘅炸漿，炸起嚟外脆內嫩，肉汁豐富。而製作酸甜醬嘅新鮮有機無花果，係由餐廳嘅自家果園種植，為咕嚕肉增添清香嘅味道。

傳統×創意點心

厚切原味蘿蔔糕（$56/份）、原隻鮑魚燒賣皇（$58/件）、避風塘蝦餃（$48/份）

呢度亦有唔少傳統同創新嘅點心款式：
- 厚切原味蘿蔔糕用清心蘿蔔、本地生曬臘味同頂級瑤柱、蝦米每日新鮮製作。蘿蔔糕切成粗條狀再煎至四面香脆，焦香得嚟有咬口，而嗜辣嘅朋友則可以揀麻辣口味。
- 原隻鮑魚燒賣皇將經典點心升級，薄身嘅手工燒賣皮包上用手切豬腩肉、冬菇同新鮮蝦仁製成嘅餡料，同一般燒賣相比，口感紮實又大隻啲；而面頭嘅鮑魚，用鮑汁慢火煨煮4個鐘，鮮味十足。
- 避風塘蝦餃係將原隻蝦餃以大火炸至外皮香脆軟糯，再用富本地特色嘅避風塘風味配料爆炒，加上餡料選用鮮嫩爽口嘅海蝦，食落爽口彈牙，集鹹、香、鮮、辣嘅滋味。

餐廳以深木色、緋紅色同香檳金做主調，又以素色嘅日式擺作裝飾，糅合東瀛同現代元素；配襯維港景色，環境幽雅舒適

卡位空間寬闊，頂部設計成拱形，再以木柱相接，帶點復古感覺

粵藝館 (海港城海運大廈)   
地址: 尖沙咀廣東道3-27號海港城海運大廈3樓OT310號舖

餐廳開始為中秋節作準備，用OpenRice餐飲券買月餅有73折優惠：
口感豐富迷你蛋黃白蓮蓉月餅6個裝（餐飲券按此）
金黃濃郁迷你流心奶黃月餅6個裝（餐飲券按此）