香港雖然仍然受到疫情困擾，但係最近就愈開愈多新餐廳。好似位於尖沙咀嘅1881古跡咁，就一口氣開咗三間全新嘅餐廳，有摩登中菜、有輕法式餐廳，亦有特色扒房。

摩登中菜   后園

新開嘅中菜廳，菜式選擇豐富，集齊中國八大菜系，無論係廣東菜、上海菜定巴蜀風味等都有得食，更邀得曾喺米芝蓮星級中菜廳工作嘅陳其白師傅擔任總廚。

點心款款精巧，賣相一流。好似粉紅色嘅玫瑰蝦餃，面層嘅一片玫瑰花瓣固然係點睛之作，但師傅嘅心思不可沒。先以玫瑰花水浸外皮，再用玫瑰花醃蝦，令到成粒蝦餃都滲透住陣陣花香，創新之餘，亦不忘蝦餃包13摺嘅傳統，皮薄蝦爽。至於橙色嘅係麻辣濃湯小籠包，以甘筍汁為外皮上色，一啖食落去，除咗有豬肉嘅鮮香外，仲有刺激嘅川辣汁，鍾意食辣嘅朋友仔必試。

 瓊州胡椒餅、野菌素腸粉

除咗點心，餐廳亦有多款獨門名菜，首推一定係味道香濃 、口感豐富嘅龍蝦綿花泡飯。師傅會烘香隻龍蝦之後再煎一煎，然後再用大火熬9個字，令到龍蝦嘅鮮甜同精華盡出。「綿花」口感軟綿，係將帶子肉釀入蛋白中，再等佢慢慢喺湯上浸熟。到上菜後，先至喺客人面前倒埋脆米，務求做到啖啖都有卜卜脆嘅效果。

 法蔥黑松露脆皮雞

輕法式餐廳  ODEA

法國菜一向畀人用餐時間長、擺碟靚但份量少嘅印象，不過呢間餐廳就有啲唔同。份量大大der，share都可以。而且感覺開揚光猛，仲有室外長廊嘅用餐位置，有如置身庭園中。餐廳由米芝蓮星級名廚Calvin Choi主理，提供多元化嘅時令菜式。

講到靚，一定係好似一朵花咁嘅紅菜頭油甘魚配香檳啫喱。底層嘅油甘魚他他好鮮爽，面頭嘅香檳啫喱亦有淡淡酒香，平衡有致。而薄切嘅生牛腰肉薄片配山葵蘿蔔，陣陣鹹香。

使用多款摩洛哥醃料泡製嘅摩洛哥風味烤雞，煎香後加入西班牙橄欖油、酒、醋等再煮，皮脆肉嫩，juicy得嚟啖啖都充滿濃郁香料味。

最尾必食甜品，特別推介朱古力梳乎厘伴雲呢嗱雪糕，記住唔好擺咁耐先食呀，會塌㗎。朱古力味濃香，口感鬆軟，食完好滿足！

特色扒房   The Steak Room

即將開業嘅扒房，雲集咗前星級酒店集團扒房嘅團隊，主力提供多款來自世界各地嘅牛肉，更有坊間少見嘅朱古力和牛，並奉行「從農場到餐桌」嘅理念，牛魔王要bookmark定了。

想要餐全牛宴並冇難度，先嚟一份牛肉他他。肉質嫩滑香口，配埋自家製嘅薯片同芒果醬，零舍開胃。

主角當然係烤牛。Mayura Wagyu朱古力和牛，牛魔王冇可能唔識。由南澳進口，係100%純種和牛嚟，而且更以朱古力飼養法養大，油份比一般牛肉更重，肉味亦比一般澳洲牛肉更香。

地址：尖沙咀廣東道2A號富衛1881公館主樓

文、相、片：Kar