皇上張敬軒今次唔唱《他的故事》喇，而係講「她的故事」。邊個她？皇后囉，法國18世紀嘅瑪麗‧安托瓦內特皇后呀。話說佢灣仔間餐廳聽日開始推出全新主題嘅下午茶，就係以呢個爭議性大但同時又極度貪靚、奢華嘅皇后做主角，透過一個三層架同「首飾盒」去感受下嗰種皇室生活品味！

上菜前講下皇后嘅故事先，大家對瑪麗皇后最深印象可能就係佢嗰句「Let  them eat cake！」喇。但原來呢句笨唔係真係出自皇后本人把口，只不過係佢一向畀人追求享受嘅態度而被後人「加」畀佢。Any肥，總之呢個皇后就係好鬼鍾意珠光寶氣、香檳、莓果、甜品同埋花花世界啦。所以今次呢個下午茶，都有唔少嘢食係以花同莓果入饌，兼有好多珠寶元素添。

咁點解揀一個咁有爭議性嘅人物去做主角？軒仔話因為皇后同大家一樣，生於動盪嘅時代，但喺research嘅過程中發現佢係一個好有taste嘅皇后，喺多變嘅社會中可以搵到自己嘅comfort zone，對生活有追求，對品味有執著，就希望將佢嘅審美同對生活追求嘅精神加入下午茶餐度喇。「我哋本身係法國餐廳，都希望介紹多啲法國文化畀大家。做呢個藝術成分比較高嘅茶餐，本身有佢嘅歷史意義，希望大家除咗嚟食好西之外，對歷史或者法國文化都會有多啲了解。」

眾所周知，逢係軒仔嘅出品，基本上都有古典美同靚樣嘅保證。今次「瑪麗皇后的首飾盒」主題嘅下午茶都唔例外。成個set一睇就係貴氣，樣樣都咁打卡able。軒仔話三層架嘅頂層係重點，三款甜品都充份表現到瑪麗皇后嘅奢華，同埋有幾咁識享受。好似瑪麗皇后的香檳杯，就係香檳啫喱配荔枝果肉、粉紅番石榴果蓉同埋雲呢嗱慕絲，甜甜酸酸咁幾清新。上面仲有「鑽石」同「珍珠」，就連塊食用玫瑰花瓣都大有來頭，係每日新鮮直送過嚟！

紫羅蘭修女泡芙嘅紫羅蘭吉士係由法國入口，下層加上黑加崙子果醬，仲有粒粒珍珠同通花蝴蝶（食得㗎都），就咁睇都覺得好精緻，食落仲有陣好似香水嘅味道。而打開牛奶朱古力禮物盒嘅盒蓋，就會食到裡面嘅特濃朱古力脆脆、冧酒提子慕絲同牛奶朱古力慕絲。唔好淨係掛住食，望下個盒，好鬼靚，軒仔仲話「如果佢而家在身嘅話，肯定都想跳返起身食呀。」盒上嘅宮廷花樣彩繪圖案係嗰個年代好興嘅pattern嚟，蓋面用咗皇后側面嘅鍊咀嚟做裝飾。

中間嗰層係scone，睇落好似相對冇乜特別，但呢層係軒仔最愛，就梗係有佢嘅過人之處啦。「牛油嘅份量或者係麵粉嘅發酵程度都會影響scone嘅口感，而我哋呢個真係做到出面脆，入面係煙韌、軟熟嘅。」而今次仲特地為咗呢個主題，創作咗士多啤梨乾果玫瑰鬆餅。

最底嗰層係4款鹹點，包括自家製芝士煙肉批、法式蘿蔔絲批配辣根醬、法式香腸酥卷，同埋三文魚他他三文治配魚子醬，呢個三文治係用咗兩種唔同配料嘅麵包皮，再夾咗啲三文魚喺入面，加埋香蔥，令到佢好香口。

但講到最最最OP嘅，一定係最後先上嘅「首飾盒」喇。真係成個首飾盒咁㗎。一打開，嘩！（真心會尖叫）係成條珍珠頸鍊呀！唔好誤會，呢條係食用珍珠頸鍊，連埋紅絲絨面都食得落肚。「呢條係皇后第一條訂造嘅珍珠鍊嚟，每粒都係水滴形珍珠。亦係佢遺物清單中拍賣價最高之一嘅物件。」呢個玫瑰慕絲蛋糕係糕餅主廚Mandy Siu嘅大作，海綿蛋糕好薄身，淡淡玫瑰幽香，仲有啲糖粉閃令令。至於條鍊嘅珍珠，就係一粒粒人手製嘅朱古力同糖珠嚟。像真度高到呢~ 今次真係珍珠都冇咁真呀！

 張敬軒與糕餅主廚Mandy Siu

是咪睇到好心動？留意返呢個tea set係逢星期六、日同公眾假期先有，每日限量廿份，想食就要早啲上網訂定位喇。但聽講暫時booking已經full到去11月頭喇……

 同場加映餅店新出法國皇室牛角酥（紅桑子、荔枝果肉、玫瑰杏仁餡）｜10月17日正式發售

瑪麗皇后的首飾盒 主題下午茶
預約網址：www.junon.com.hk
日期：逢星期六、日及公眾假期供應
時間：下午3:00至5:30

仙后餐廳
地址：灣仔皇后大道東213號胡忠大廈2樓

文：Kar
相：Cathy、Kar
片：Cathy